AQSH Prezıdenti Donald Tramp memleket basshysy Qasym-Jomart Toqaevty Qazaqstan Prezıdenti laýazymyna kiriskenine bir jyl tolýyna oraı quttyqtap, jedelhat joldady. Bul týraly Aqorda habarlady.
– Amerıka halqynyń atynan aldaǵy ýaqytta Qazaqstandaǵy beıbitshilikti, ósip-órkendeý men qaýipsizdikti odan ári nyǵaıtý jolyndaǵy eńbegińizge tolaǵaı tabystar tileımin. Sonymen qatar COVID-19 indetiniń taralýyna qarsy qabyldaǵan jedel sharalaryńyzǵa oń baǵa bergim keledi. Pandemıany toqtatý jáne COVID-19 indetinen keıingi kezeńde ekonomıkany qalpyna keltirýde bizdiń birlesken kúsh-jigerimiz mańyzdy bolyp qala bermek, – delingen jedelhatta.
Sonymen qatar AQSH Prezıdenti Qazaqstanda qolǵa alynǵan reformalardy qoldaıtynyn aıtyp, eki el arasyndaǵy strategıalyq baılanysty odan ári damyta berýge nıetti ekenin jetkizgen.
– Sizdiń saıası jańarýǵa baǵyttalǵan reformalyq, órshil baǵdarlamańyz erekshe maqtaýǵa laıyq. Halyqtyń Úkimetke degen senimin arttyrý, gúldengen jáne serpindi qoǵamnyń negizgi irgetasy sanalatyn bostandyqtardy qorǵaýdy kúsheıtý boıynsha alǵa qoıǵan maqsattaryńyzdy Amerıka Qurama Shtattary qoldaıdy. Biz keńeıtilgen strategıalyq áriptestigimizdiń aıasynda osy bastamalardy iske asyrýda árdaıym Sizben seriktes bolýǵa daıynbyz, – dedi Donald Tramp.
Sondaı-aq Tramp Toqaevqa zor densaýlyq, sáttilik pen ıgilik tiledi.
Pikir qaldyrý