Depýtattyq korpýs pen Úkimettiń birlesken jumysy «Nur Otan» partıasynyń saılaýaldy baǵdarlamasynyń qajetti zańnamalyq negizin qalyptastyryp, partıanyń saılaý aldyndaǵy barlyq mindettemelerin oryndaýǵa múmkindik berdi. Bul týraly búgin Májilistegi «Nur Otan» partıasy fraksıasynyń keńeıtilgen otyrysynda talqylandy, dep habarlady májilistiń baspasóz qyzmeti.

Partıanyń «Qazaqstan – 2021: Birlik. Turaqtylyq. Jasampazdyq» atty saılaýaldy baǵdarlamasynyń oryndalý barysyn talqylaý vıdeokonferensıa rejıminde ótti.

Jıynǵa qatysýshylar baǵdarlamany júzege asyrý barysyna aı saıyn monıtorıń júrgizip otyrýdy Elbasy, «Nur Otan» partıasynyń kóshbasshysy Nursultan Nazarbaevtyń alǵa qoıǵan tapsyrmasy ekenin atap ótti. Sonymen qatar, depýtattyq korpýs pen Úkimettiń birlesken jumysy, qajetti zańnamalyq negiz qurý qazirgi ýaqytta partıanyń barlyq saılaý aldyndaǵy mindettemeleriniń 90%-yn oryndaýǵa múmkindik bergenine toqtaldy.

Fraksıanyń keńeıtilgen jınalysyna qatysqan premer-mınıstr Asqar Mamınniń aıtýynsha, qazirgi ýaqytta alda turǵan barlyq josparlanǵan is-sharalar merziminde oryndalmaq.

Osy rette, fraksıa músheleri saılaý aldyndaǵy mindettemelerdi oryndaý olardyń turaqty baqylaýynda bolatynyn atap ótti.

Zań jobalary boıynsha jumys barysynda depýtattar partıanyń alǵa qoıǵan mindetterin sheshýde, eń aldymen, qajetti qarjy resýrstaryn qamtamasyz etýdiń naqty joldaryn izdestirýge basa nazar aýdardy.

Sonymen qatar, Májilis depýtattary ishki naryqty otandyq ónimdermen tolyqtyryp, turǵyn úımen qamtamasyz etý, ataýly áleýmettik kómekti taǵaıyndaýdaǵy ashyqtyq úshin memlekettik organdardyń aqparattyq júıelerin «E-Halyk» aqparattyq júıesimen biriktirýdiń merzimderin aıaqtaý syndy birqatar máselelerdi kóterdi.

Depýtattar jumystyń áleýetti baǵyttary týraly aıta kele, álemdik tendensıalar men eńbek naryǵynyń qajettilikterin eskere otyryp, ónimdi jumyspen qamtýǵa halyqtyń belsendi qatysýy qajettiligine nazar aýdardy. Sondaı-aq Májilis depýttary ishki naryqty molaıtyp, eksportty damytý úshin agrarlyq salany damytýdyń jańa tásilin ázirleýdiń qajettigine toqtaldy.