Esep komıteti «Nur Otan» partıasy» QU-nyń qyzmetin udaıy tekserip otyrady. Bıyl Respýblıkalyq búdjettiń atqarylýyn baqylaý jónindegi Esep komıteti sońǵy úsh jyl ishinde búdjet qarajatynyń paıdalanylýyna memlekettik aýdıt júrgizdi.

«Nur Otan» partıasynda Esep komıteti júrgizgen aýdıt - saıası partıalardy respýblıkalyq búdjetten qarjylandyrý bastalǵannan beri júrgizilgen úshinshi tekserý. Buǵan deıingi tekserýler 2013 jáne 2017 jyldary ótken-di.

Tekserý nátıjeleri boıynsha qarjylyq zań buzýshylyqtar anyqtalǵan joq. Aldyńǵy eki tekserýden soń jasalǵan usynystardy oryndaý búdjet qarajatyn basqarýdyń sapasyn jaqsartty.

Aýdıt barysynda anyqtalǵan prosedýralyq buzýshylyqtardy joıý boıynsha sharalar qabyldandy.

Aıqyn ári ashyqtyq jáne eseptilik qaǵıdattaryn basshylyqqa ala otyryp, partıa 2014 jyldan bastap BAQ-ta óz qyzmeti týraly qarjylyq esep jarıalap otyrady.

Qazirgi tańda partıanyń ınfraqurylymy damyǵan, qataryndaǵy 846 myńnan astam partıa múshesiniń basyn biriktiretin 247 fılıal, 4 500 bastaýysh partıa uıymy bar.

Halyqpen tıimdi baılanys ornatý úshin ár fılıalda qoǵamdyq qabyldaý bólmeleri jumys isteıdi. Birinshi jartyjyldyqtyń qorytyndylary boıynsha qoǵamdyq qabyldaýlarǵa 2019 jyldyń sáıkes kezeńimen (61,9 myń) salystyrǵanda 3,5 ese kóp ótinish (218,4 myń) tústi. Onyń 98%-y sheshildi, 36%-y jáne 2%-y oryndalýda.

Sáýir aıynyń basynan beri partıanyń aımaqtyq fılıaldarynyń jedel jeli telefondaryna 100 myńnan astam qońyraý kelip tústi. Al fılıaldardyń áleýmettik jelilerdegi akkaýnttaryna jazylýshylar sany instagram-da 56,9 myńǵa, facebook-te 6,4 myńǵa kóbeıdi.

Sonymen qatar, partıanyń saraptamalyq jáne bilim berý ortalyqtary bar. Olar óz qyzmeti barysynda jumystarynyń tıimdiligi men qajettiligin dáleldep otyr. Atap aıtsaq, bul – Qoǵamdyq saıasat ınstıtýty men Saıası menedjment mektebi.

Sondaı-aq partıanyń quramyna oǵan servıstik-qoldaý, polıgrafıalyq qyzmet kórsetetin «Nur Otan» sharýashylyq basqarmasy» JSHS jáne partıanyń respýblıkalyq baspasóz quraldary, tele jáne radıo arnalary men ınternet-resýrstarynyń basyn biriktiretin «NUR-Medıa» JSHS kiredi.

Jastar saıasatyn tıimdi júzege asyrý úshin partıa janynda «Jas Otan» Jastar qanaty jumys isteıdi. Onyń quramynda búginde 105 myńnan astam jasotandyqtar bar.

Jalpy, joǵaryda atalǵan uıymdardy esepke ala kele, partıa apparaty 2931 adamdy jumyspen qamtamasyz etip, byltyrdyń ózinde el búdjetine 1,3 mlrd. teńge salyq tóledi.