JOO-nyń aqyly bóliminde oqıtyn stýdentterge oqý aqysyn arzandatýdy mekeme orny ózi sheshedi. Bul týraly bilim jáne ǵylym mınıstri Asqat Aımaǵambetov ortalyq komýnıkasıalar qyzmetinde ótken onlaın-brıfıńte aıtty.

– Joǵary oqý oryndaryna akademıalyq jáne qarjylyq derbestik berdik. Sondyqtan oqý aqysy qansha bolatyny týraly máseleni ár ınstıtýt, ár ýnıversıtet, ár akademıa ózi sheshedi. Qashyqtan oqytqanda shyǵyn az bolady degen túsinik bar. Negizinde olaı emes, mysaly oqý ornynda 5 korpýs bolsa, beseýi de jabylmaıdy. Onyń komýnaldyq shyǵyndary, jumys istep jatqan oqytýshylardyń shyǵyndary bar, – dedi mınıstr.

Aımaǵambetov qyrkúıek aıynda ýnıversıtetter men kolej stýdentteri qashyqtan oqıtynyn málimdedi.

Buǵan deıin densaýlyq saqtaý mınıstri Alekseı Soı qyrkúıekten bastap barlyq mektepterde oqýshylardy qashyqtan oqytýdy usynǵan. Úkimet basshysy Asqar Mamın densaýlyq saqtaý mınıstrliginiń usynysyn qoldap, oqýshylar birinshi toqsandy qashyqtan oqıtynyn málimdedi.