Nur-Sultanda karantınge qaramastan oıyn-saýyq keshin ótkizgen qala turǵyndary ustaldy. Bul týraly qalalyq polısıa departamenti habarlady.

Departament taratqan habarlamaǵa qaraǵanda, túnniń bir ýaqytynda shamamen 50 adam Saraıshyq kóshesi boıynda saýyq keshin ótkizgen.

"İstiń mán-jaıyn anyqtaý úshin barlyq qonaqtar polısıa bólimshesine jetkizildi. Tekserý nátıjesinde 42 adam Ákimshilik quqyq buzýshylyq kodeksiniń 441-baby (Jekelegen qoǵamdyq oryndarynda temeki ónimderin jáne elektrondyq sıgaretterdi tutynýǵa tyıym salýdy buzý), 437-baby (Tynyshtyqty buzý), 440-baby boıynsha (Alkologoldik ishimdikterdi ishý nemese qoǵamdyq oryndarǵa masań kúıinde kelý), al 1 adam jeke basty kýálandyratyn qujattarsyz turǵany úshin ákimshilik jaýapkershilikke tartyldy

Keshtiń uıymdastyrýshysy buryn elordadaǵy dámhanalardyń birinde jumys istegen. Jumys orny sanıtarlyq-epıdemıologıalyq normalar talaptaryna saı kelmegendikten jabylǵan. Ol osy keshti uıymdastyrý úshin kotejdi jalǵa alyp, áleýmettik jeli arqyly keshtiń ótiletinin habarlaǵan. Kotejdi jalǵa alýshyǵa qatysty materıal prosesýaldy sheshim qabyldaý úshin Nur-Sultan qalasy boıynsha taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldandy" delingen departament taratqan habarlamada.

Qazaqstanda naýryzdan beri toı-jıynǵa, oıyn-saýyq keshterine tyıym salynǵan.