Almaty qalasyndaǵy dárihanalarda dári-dármek tolyqtaı jetkilikti jáne kezekte turǵan halyq sany azaıdy. Bul týraly dári-dármekterdi úılestirý koordınatory Zańǵar Sálimbaev baspasóz ókilderiniń qatysýymen bolǵan arnaıy reıd barysynda aıtty.

Onyń sózinshe, dárihanalarda baqylaý jumystary 29 maýsymnan bastalyp, arnaıy monıtorıń toptary tekseris júrgizgen.

– Osy aralyqqa deıin biraz jumystardy júzege asyrdyq. Birinshiden iri kompanıalarmen óndiris salalary, dárihana jelilerimen kelisimshartqa qol qoıdyq. Kelisimshart boıynsha suranysqa ıe dári-dármekterdiń sanyn shekti baǵada satýdy baqyladyq. Sondaı-aq otandyq óndirýshiler men iri kompanıalar kelisimshartta kórsetilgen dárihanalarǵa dárilerdi jetkizýdi josparlaǵan. Búginde kelisimshart negizinde jumystar júrgizilýde. Bastapqyda 105 dárihanany dári-dármekpen qamtamasyz etý belgilengen bolsa, qazir onyń sany ósip, 369-ǵa jetti, – dedi Zańǵar Sálimbaev.

Onyń aıtýynsha monıtrongtik toptar kúndelikti dárihana jelilerine baryp, karantındik talaptardyń saqtalýyn jáne dári-dármek baǵasynyń shektiligin baqylap otyrady.

– Keıbir adamdar dári-dármek alyp, ony onlaın túrde qymbat baǵada satýda. Mundaı zańbuzýshylyqtardy quqyq qorǵaý organdary baqylap otyr. Naryqty turaqtandyrý úshin elge 6 mln-ǵa dári-dármek alyndy. Ári qaraı dárihanalarǵa qajetti dári-dármekterdi jetkizý úshin turaqtandyrý qoryna 5 mlrd bóldik. Call ortalyqtarymyzǵa kóptegen qońyraýlar keletin, qazir azaıdy. Ótken jumadan bastap dári-dármekterge suranys tómendedi. İri dárihanalarǵa baryp tekseris jasaǵanymda uzyn-sonar kezekte turǵan halyq bolmady. Halyqqa beriletin tegin dári-dármekti emhanada tirkelgen jáne turǵylyqty mekenjaıy bar azamattar ala alady, – dep atap ótti. 

Arnaıy monıtorıń top jýrnalısermen Almaty qalasynyń №3 dárihanasyna baryp, dári-dármek tapshylyǵy jáne kezekti tekserdi.

№3 dárihana meńgerýshisi Aınur Almahambetova.nyń sózinshe, dárihanada bir apta buryn uzyn-sonar kezek bolǵan, qazir azaıǵan. COVID-19-dy emdeýge arnalǵan dáriler túgel bar. Qazirgi ýaqytta eshqandaı dári tapshylyǵy joq. Dárihana qajetti dári-dármekpen tolyq qamtyldy. Eń bastysy dárihanaǵa kelgen adamdardyń dene qyzýyn tekserip, maska taǵýyn, araqashyqtyq saqtaýyn qadaǵalaımyz, – dedi ol.

"Qoldaý" kásipkerlik ortalyǵynyń bas menedjeri Erlan Saparuly búgingi kúnge deıin qala turǵyndarynan kúnine qansha qońyraý kelip túskenin aıtty.

– Biz táýlik boıy jumys jasap, dári-dármekter boıynsha halyqqa tolyq aqparat berip otyrdyq. Qońyraý soǵýshylar kóbine dári-dármekterdiń baǵasyn, kólemin, mekenjaıyn suraıdy. 14-shi shildede myńǵa jýyq qońyraý kelip tústi. Qazirgi ýaqytta qońyraý shalýshylar azaıdy. Sebebi dárihanalarǵa qajetti dári-dármekter jetkizilgen. Qazir táýligine 200-250-ge jýyq qońyraý qabyldaımyz. Biz dárihanalar da suraǵan dárileri barma joqpa naqty anyqtap beremiz. Odan bólek dári-dármekter joǵary baǵada satylmaýyn baqylaımyz, – dedi ortalyqtyń bas menedjeri.