Elordanyń №2 qalalyq kópsalaly aýrýhanasynyń bas dárigeri Ivan Ivanovıch Lı qaıtys boldy. Bul týraly ákimdiktiń baspasóz qyzmeti habarlady.

Ivan Ivanovıch 60 jasynda koronavırýs ınfeksıasynan kóz jumdy.

"Ivan Lı óz isiniń naǵyz mamany bolatyn. Ol kóptegen adamdardyń ómirin qutqaryp qaldy. Alǵashqy kúnnen bastap-aq koronavırýspen kúreste aldyńǵy shepte turdy. Onyń otbasy men jaqyndaryna kóńil aıtamyz" delingen ákimdik taratqan habarlamada.

Ivan Ivanovıch Lı 1960 jyly Qaraǵandyda dúnıege kelgen. Qaraǵandy​​memlekettik medısına ınstıtýtynyń hırýrgıa mamandyǵy boıynsha bitirgen.

3 jyl Qaraǵandy ​​oblysyndaǵy Jastar aýdanynyń ortalyq aýrýhanasynda hırýrg, odan keıin Qaraǵandy ​​qalasynyń jedel aýrýhanasynda ýrolog bolyp jumys istedi. 1996 jylǵa deıin Almatydaǵy Ortalyq qalalyq klınıkalyq aýrýhananyń ýrologıalyq bólimin basqardy.

Sodan keıin ol qaladaǵy onkologıalyq dıspanser men №1 klınıkalyq aýrýhanada bas dárigerdiń orynbasary jáne qazirgi zamanǵy medısınalyq tehnologıalardyń dıagnostıkalyq ortalyǵynyń bas dárigeri qyzmetinde boldy.

2006 jyly Ivan Ivanovıch Almatydaǵy №7 qalalyq klınıkalyq aýrýhanany basqaryp, keıinnen elordaǵa aýysty.

2015 jyly Nur-Sultan densaýlyq saqtaý basqarmasy bastyǵynyń orynbasary, keıin №2 qalalyq kópsalaly aýrýhananyń dırektory boldy.

Buǵan deıin qaýipti indetten Qazaqstan qorǵanys mınıstriniń burynǵy orynbasary – Ámirbek Tógisov, Qazaqstannyń prezıdenttigine úmitker bolǵan – Jaqsybaı Bazylbaev, Aqtóbe qalasynda ınfeksıalyq aýrýhananyń bas dárigeri – Qalıhan Qozbaǵarov, Almaty oblysy ákiminiń orynbasary – Serikjan Beskempirov, sonymen qatar Almaty oblysynyń Bas memlekettik sanıtar dárigeri – Qaırat Baımuhambet qaıtys bolǵan.