"Talgo" poıyzynyń eki baǵyt boıynsha qozǵalysy ýaqytsha toqtatylady. Bul týraly "Jolaýshylar tasymaly" AQ baspasóz qyzmeti habarlady.

Mekemeniń baspasóz qyzmetiniń habarlaýynsha, eldegi epıdemıologıa jaǵdaıyna baılanysty jolaýshylardyń eki baǵyt boıynsha poıyzǵa suranysy azaıǵan.

"Qoǵamnyń qarjy máselesindegi qolaısyzdyqtyń aldyn alý maqsatynda, suranys az bolyp otyrǵan "Talgonyń eki komersıalyq jolaýshylar poıyzynyń júrýin ýaqytsha toqtatý týraly sheshim qabyldady:

№ 69/70 "Almaty-2 – Óskemen-1" baǵytyndaǵy poıyz Almatydan jóneltilýi 1 tamyzdan bastap, Óskemennen kelýi/jóneltilýi 2 tamyzdan bastap;

№ 51/52 "Almaty-2 – Oral" baǵytyndaǵy poıyz Almatydan 2 tamyzdan bastap, Oraldan kelýi/jóneltilýi 4 tamyzdan bastap" delingen habarlamada.

Osy eki poıyzǵa jol júrý qujatyn (bılet) alyp qoıǵan jolaýshylar aqshalaryn tolyq qaıtaryp ala alady.