Almatyda Halyk Arena sport kesheni bazasynda koronavırýstyq ınfeksıamen aýyrǵandarǵa ýaqytsha gospıtál ashylady. Qazir sport saraıynda daıyndyq jumystary júrip jatyr. Bul týraly ákimdik habarlady.

– Halyk Arena bazasynda ınfeksıalyq stasıonar oryndaryn ashý májbúrlikten týǵan sheshim. Aýrýhanalarda oryn jetpegendikten, osyndaı qadamǵa baryp otyrmyz. Osyndaı qıyn ýaqytta qala qyzmetterine kómek kórsetýimiz kerek. Bul shara kóptegen azamattardyń ómirin saqtap qalýǵa kómektesedi dep senemiz, – dedi sport saraıynyń «M-Line Property Management» basqarýshy kompanıasynan.

Qazir sport saraıynda jumys istep turǵan sport seksıalary, Halyk Arena keshenin jalǵa alýshylar ýaqytsha Almaty Arena keshenine kóshedi.

– Sportshylarǵa daıyndyq kezeńin úzýge bolmaıdy. Sondyqtan, sport keshenin jalǵa alýshylardyń Almaty Arena keshenine kóshýin qarastyrýdy suradyq, – dedi olar.

Basqarýshy kompanıa ókilderi sport keshenin ózgertýge barynsha muqıat bolǵanyn aıtty.

– Sport nysanyn gospıtálge aınaldyrý tek oryn bosatý emes, qajetti mıkroklımat jasaý, sanıtarlyq aımaqtar túzý, bólmelerdiń jeldetilýin, tazalyǵyn qamtamasyz etý bolyp otyr. Basqarýshy kompanıa sport nysanynyń qaıta óz profıline eshbir nuqsansyz aýysýyna kepil bolady, - dedi kompanıadan.