COVID-19 ben kúres, qalǵan barlyq shyǵyndar qysqarady. Bul týraly qala ákimi Baqytjan Saǵyntaev «Almaty» telearnasynda ótken Akimat Live baǵdarlamasynyń tikeleı efırindegi suraqtarǵa jaýap berý kezinde aıtty.

Qala ákimi birinshi kezekte koronavırýsqa qarsy kúres ekenin atap ótti. Osyǵan baılanysty búdjettiń barlyq basym emes shyǵyndary qysqaryp, qarajat kovıdke qarsy sharalarǵa baǵyttalady.

Onyń aıtýynsha, buryn josparlanǵan qurylys jobalaryn kelesi jylǵa qaldyrýǵa bolady.

«Pandemıa bastalǵannan keıin biz birden barlyǵyn (pandemıamen kúreske qatysy joq jobalardy) toqtattyq. Kelesi jylǵa deıin pandemıa sozylmaıdy dep úmittenemiz. Kelesi jyly jeńil bolady jáne biz josparlanǵan qurylys jobalaryn qaıta jandandyramyz», — dedi ákim.

Sondaı-aq ol sporttyq-mádenı is-sharalar toqtatylǵanyn atap ótti.
Jalpy, koronavırýspen kúreske (aǵymdaǵy jyldyń naýryz aıynan bastap) shamamen 60 mlrd tg bólindi, onyń ishinde Úkimet tarapynan 11,5 mlrd tg bólindi. Bul qarajat mynadaı sharalardy iske asyrýǵa baǵyttaldy: áleýmettik mańyzy bar azyq-túlik taýarlaryna baǵany turaqtandyrý; jeke qorǵanys quraldaryn satyp alý; kireberisterdi, aýla aýmaqtaryn jáne kóshelerdi dezınfeksıalaý jáne t. b.

Sonymen qatar, osy jyldyń 16 shildesinde máslıhat aǵymdaǵy jyldyń qalalyq búdjetin naqtylaý týraly qaýly qabyldady, onyń aıasynda KVI-men kúresýge 30 mıllıardtan astam teńge bólindi. Onyń ishinde kovıdti gospıtáldardy dárilik preparattarmen qamtamasyz etý úshin turaqtandyrý jáne rezervtik qorlar qurýǵa jáne farmasevtıkalyq kompanıalarǵa paıyzsyz kredıt berýge baǵyttalǵan. Sondaı-aq «Halyq Arena» bazasynda jumys istep turǵan jáne qurylyp jatqan kovıdty stasıonarlar, OQKA reanımasıasy, klınıkalyq-dıagnostıkalyq zerthana jáne juqpaly aýrýlar aýrýhanasy úshin medısınalyq jabdyqtar satyp alýǵa qarajat bólindi.