Qazaqstannyń ulttyq qaýipsizdik komıteti el tarıhyndaǵy iri esirtki zerthanasynyń joıylǵanyn habarlady.

Komıtettiń habarlaýynsha,  2020 jyly 27 shildede ulttyq qaýipsizdik komıteti Almaty qalasynda zerthana jaǵdaıynda esirtki óndirisimen aınalysqan eki qazaqstandyq azamatty ustady.

Zerthana men ustalǵandardy tintý kezinde quny 1,5 mıllıardty quraıtyn 55 kılogramnan artyq "mefedron" esirtki zaty, iri somadaǵy shetel valútasy men atys qarýy anyqtalǵan. Sondaı-aq esirtkini sapaly óndiretin zerthana jabdyqtary men 30 kılogram esirtki jasaýǵa jetetin bir tonnaǵa jýyq prekýrsor men hımıalyq reagentter tabylǵan.

"Ustalǵan adamdar tergeý ızolátoryna qamaldy. Esirtki jasaý jáne ótkizý faktisi boıynsha múlikti tárkileýmen 15 jylǵa deıingi merzimge bas bostandyǵynan aıyrý jazasyn kózdeıtin Qazaqstan qylmystyq kodeksiniń 297-babynyń ("Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý") 3-bóligi boıynsha qylmystyq is qozǵaldy" delingen habarlamada.

Kúdiktiler bastapqyda jasyryn túrde esirtki satýmen uıymdastyrǵan. Keıinnen túsken aqshaǵa "İle-Alataý ulttyq parki" aýmaǵynda kotej satyp alyp, ony jasyryn zerthanaǵa aınaldyrǵan.

Olar saýdasyn "DarkNet" sekildi qupıa jeli arqyly iri esirtki dúkenderine satý arqyly jasaǵan.   

Ustalǵandardyń aıtýy boıynsha, óndirilgen esirtki Qazaqstanda tazalyǵy men sapasy boıynsha uqsasy bolmaǵandyqtan, iri qalalardyń satyp alýshylary arasynda joǵary suranysqa ıe bolǵan.