Densaýlyq saqtaý mınıstrligi Qazaqstannyń shetelden keletin ımportqa táýeldi ekenin aıtty. Bul týraly densaýlyq saqtaý vıse-mınıstri Lúdmıla Buırabekova onlaın-brıfıngte málim etti, dep habarlady tengrinews.kz.

– Aqpanda maskanyń baǵasy 15 teńge bolǵan, biraq bul kezde pandemıa órship turǵan edi. Barlyq el, sonyń ishinde Qazaqstan da jeke qorǵanys quraldaryn syrtqa shyǵarýdy toqtatty. Biraq biz ımportqa, Qytaıdan ákelingen shıkizatqa táýeldimiz. Sol kezde shıkizat qoljetimsiz edi, al óndirýshiler medısınalyq uıymdarmen kelisim-shart boıynsha jumys istedi. Sol ýaqytta shynymen betperdege tapshylyq boldy. Sonda biz SİM-men birge prosesterdi avtomattandyrý úshin jabdyq ákelýge kómektestik.

Budan basqa, biryńǵaı dıstrıbútor uzaq merzimdi sharttar konkýrsynyń qorytyndysyn shyǵardy. Bizde maska óndirýshilerdiń sany artty. Memleket betperde baǵasyn rettemeıdi. Al tótenshe jaǵdaı rejıminde memlekettik komısıa naryqtaǵy baǵany turaqtandyrý úshin ǵana shekti baǵany belgilegen bolatyn. Onda da alypsatarlar bolǵan. Sondyqtan baǵany 118 teńge qylý sheshimi qabyldandy, – dedi vıse-mınıstr.