Almaty qalasy Áýezov aýdanynyń polısıa qyzmetkerleri "jalaqysy joǵary jumysqa turǵyzamyn" dep adamdardan qomaqty aqsha alǵan alaıaq áıeldi ustady. Bul týraly Polisia.kz habarlady.

– 1985 jyly týǵan 35 jastaǵy S. esimdi áıel buryn qylmystyq jaýapkershilikke tartylǵan. Ol shilde aıynyń ortasynda Abaı dańǵyly men Saın kóshesiniń qıylysynda turyp, adamdarǵa jumys usynǵan. Áıel karantın kezinde keıbir azamattardyń jumystan bosatylǵanyn jáne ýaqytsha jumys izdep júrgenin alǵa tartqan. Sengish adamdardy munaı kompanıasyna jumysqa ornalasýǵa kómek bere alatynyna sendirip, olardan aqsha alǵan. Biraq keıinnen aqsha da, jumys ta joq. Qazirgi ýaqytta bizdiń bólimge eki adam osy jaǵdaı boıynsha júgindi, – deıdi Áýezov aýdandyq polısıa basqarmasynyń bastyǵy Álisher Tursynbetov.

Sonymen qatar, polısıa kúdiktiniń qala aýmaǵynda, basqa aýdandarynda zańsyz áreketter jasaǵan bolýy múmkin ekenin joqqa shyǵarmaıdy. Osyǵan uqsas jaǵdaı basynan ótken azamattar polısıaǵa myna nómirler boıynsha habarlasa alady: 8-701-852-60-94, 8-707-515-47-35.