Qashyqtyqtan oqytý barysynda bala men pedagogte kompúter bolýy tıis. Shyǵys Qazaqstanda oqýshylar men oblys mektepteriniń muǵalimderin kompútermen qamtamasyz etý maqsatynda saraptama jasalyndy.
Tikeleı efır barysynda SHQO ákimi Danıal Ahmetov óńirdegi mektepterde 33 200 kompúter bar ekenin atap ótti. Al oqýshylardyń 88 paıyzy úı jaǵdaıynda kompútermen qamtamasyz etilgen. 22,4 myń balanyń onlaın rejımde bilim alýyna tehnıkalyq jaǵdaı jasalmaǵan. Sondyqtan 17 myńnan astam oqýshy, eń aldymen áleýmettik jaǵynan az qamtylǵan otbasylarda tárbıelenip jatqan balalarǵa mektepterdegi kompúterler beriledi. Keıin olar kompúterdi mektepke qaıtaryp berýi tıis. Sondaı-aq 197 pedagog qajetti tehnıkamen qamtamasyz etiledi.
– Mektep jasyndaǵy birneshe bala men ata-anasy qashyqtyqtan jumys istep otyrǵan balalar bar. Olardyń deni bir kompúterdi qoldanady. Atalǵan máselee mektep ákimshiliginde talqylanady. 25 tamyzǵa deıin oblys mektepterine qosymsha 9,5 myń birlik kompúter satyp alamyz. Sonymen qatar ókimettik qordan 26,5 myń birlik tehnıka alýǵa qarajat bólý qarastyrylyp otyr. Bul qarjy kózi balalar men pedagogterge qajetti tehnıkany áperýge jetkilikti, - dedi Danıal Ahmetov.
Internet máselesi de sheshimin tabady. Búgingi kúni 189 myń oqýshynyń 18,3 myńy ınternetpen qamtamasyz etilmegen. Osy máseleni sheshý úshin balalarǵa SIM kartalar men tarıfter qosylǵan joǵary jyldamdyǵy bar 5 620 roýter beriledi. Qalǵan 6 877 bala shtattyq rejımde bilim alatyn bolady.
Budan bólek, mektep jasyndaǵy balalar turatyn barlyq eldi mekende ınternet jelisiniń jyldamdyǵy artatyn bolady. Aımaq basshysynyń aıtýynsha, 2020 jyldyń 1 qyrkúıegine deıin 52 eldi mekendegi ınternet jelisi jyldamdyǵyn joǵarylatady.
