Keshe elimizde «Nur Otan» praımerızi bastaldy. Kandıdattardy tirkeýdiń alǵashqy kúni 1000-nan astam adam ótinish berdi. Olardyń – 336-sy áıel, onyń ishinde 20 kópbalaly ana, 35 jasqa deıingi – 228 jas, sondaı-aq erekshe qajettiligi bar – 8 azamat. Bastaýysh partıa uıymdarynan 322 adam usynylsa, 717 kandıdat ózin-ózi usyndy. Bul týraly partıa Tóraǵasynyń birinshi orynbasary Baýyrjan Baıbek Facebook-tegi paraqshasynda habarlady.

Onyń aıtýynsha, partıa Lıderi Nursultan Nazarbaevtyń tapsyrmasymen praımerız tuńǵysh ret respýblıkalyq partıaishilik saılaý aýqymynda ótedi. Bul – Elbasynyń bastamasymen qolǵa alynǵan «Senim. Dıalog. Bolashaqqa nyq qadam» partıa jumysyn «qaıta jandandyrý» baǵdarlamasynyń qorytyndy kezeńderiniń biri.

«Elbasy Nursultan Nazarbaev keshegi úndeýinde atap ótkendeı, partıa óz isiniń sheberlerin, el taǵdyryna alańdaıtyn tulǵalardy, sheshim qabyldaı alatyn jáne konstrýktıvti usynystar jasaı alatyn jańa azamattardy bılikke usynatyn qaınar kóz bolýy tıis.
Partıaishilik saılaýdyń ashyq ári ádil ótýine partıa tarapynan qajetti jaǵdaı jasalǵan. Bastysy – aıqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý.

Partıa Lıderi azamattardy tolǵandyryp júrgen kókeıtesti máselelerdiń ózara senim men syılastyq aıasynda kóteriletinine senim bildirdi. Kóterilgen máselelerdi partıa baqylaýǵa alýy tıis. Árbir aýdannyń, qalanyń, oblystyń saılaýaldy baǵdarlamasyna engizý úshin barlyq sheshimdi búdjettiń múmkindikterimen úılestire qarastyrý qajet.

Elimizdiń aldynda pandemıadan keıin ekonomıkalyq ósimdi qalpyna keltirý, jumys oryndaryn qurý, shaǵyn jáne orta bıznestiń jumysyn jandandyrý mindetteri tur. Sonymen birge pandemıamen kúres máselelerin taldap, onyń ekinshi tolqyny oryn alýy múmkin jaǵdaıǵa daıyndalý qajet. Munyń barlyǵy partıanyń saılaýaldy baǵdarlamasyna engizilip, nurotandyqtardyń aldaǵy 5 jylda atqaratyn is-áreketterine baǵyt-baǵdar bolady.

Taǵy da barlyq partıalyqtar men «Nur Otan» jaqtastaryn eldegi asa mańyzdy saıası dodaǵa belsendi qatysýǵa shaqyramyn!»,- dep jazdy Baýyrjan Baıbek.

Praımerızge qatysý úshin ótinishti https://primaries.kz/ saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady. Kandıdattardy usyný jáne tirkeý 28 tamyzǵa (qosa eseptegende) deıin jalǵasady.

Partıa qundylyqtaryn ustanatyn jáne saılaý quqyǵy bar kez kelgen azamat úmitker bola alady. Ol úshin praımerızge qatysýshylardy tirkeý merzimi aıaqtalǵanǵa deıin «Nur Otan»-nyń qataryna qosylý kerek

Praımerızdiń negizgi maqsaty – aldaǵy Májilis pen barlyq deńgeıdegi máslıhattar saılaýyna partıalyq tizimderge engizý úshin qoǵamnyń senimi men qoldaýyna ıe bolǵan bedeldi partıa kóshbasshylaryn anyqtaý.

Sonymen, kandıdattardy usyný jáne tirkeý 17 tamyzdan bastalyp, 28 tamyzǵa (qosa eseptegende) deıin jalǵasady. Úmitkerlerge úgit-nasıhat jumystaryna daıyndalý úshin 7 kún beriledi – 31 tamyzdan 6 qyrkúıekke deıin.

7 qyrkúıekten 3 qazanǵa deıin aralyqta kandıdattardyń úgit-nasıhat jumystaryn, onyń ishinde 14-30 qyrkúıek aralyǵynda jarıa pikirsaıystar ótedi. Pikirsaıystar «Praımerız» arnaıy aqparattyq júıesi arqyly ótip, partıanyń resmı akkaýnttarynda taratylady.

1 qazan (00-00) men 3 qazan (14.00) aralyǵynda mobıldi qosymsha jáne arnaıy veb-portal arqyly elektrondy daýys berýdi ótkizý josparlanyp otyr.

Daýys berýdiń sońǵy kúni (3 qazan) bastaýysh partıa uıymdarynyń bazasynda saılaý ýchaskeleri ashylady. Internet joq eldi mekenderde osyndaı saılaý ýchaskelerine kelip, qaǵaz búletender arqyly daýys berýge bolady.

Úmitkerlerdiń reıtıńi kórsetilgen praımerız nátıjeleri 5 qazanda jarıalanady.

Praımerız ótkizý, sondaı-aq kandıdattarǵa uıymdastyrýshylyq jáne quqyqtyq qoldaý máseleleri boıynsha "Nur Otan" partıasy 8 (800) 080 4441 arnaıy jedel jelini iske qosty.