Qazaqstandyq ınternet paıdalanýshylar belgisiz bireýdiń "5G jelisiniń synaqtan ótkiziletini jáne osyǵan baılanysty tele jáne radıohabar taratý toqtatylatyny týraly aıtqan" aýdıohabarlamany taratýda. StopFake saıty bul aqparattyń jalǵan ekenin habarlady.

Aýdıorolıktiń avtory qazaqstandyqtardy ınternetti paıdalanbaýǵa úndeıdi. Onyń pikirinshe, bul "densaýlyq úshin zıan" bolýy múmkin.

"Keıbiriniń murnynan, qulaǵynan qan ketken. Qyzdar, osy 5-6 kúnde keshke jumystan kelgen soń kitap, jýrnal oqysaq eshteńe etpeıdi. Teledıdar kórmeńder, telefonǵa jaqyndamańdar, eshteńeni qospańdar, sonda balalaryńnyń, nemerelerińniń densaýlyqtaryn saqtap qalasyńdar. Bul shynaıy aqparat, naqty aqparat, óıtkeni memleket naqty ne bolatynyn aıtpaıdy. Meniń aıtqanymnyń bolatyny ras" delingen aýdıojazbada.

"Qazteleradıo" AQ bul aqparatty teriske shyǵaryp, feık dep tanydy. Ulttyq operator habar taratý sapasyn jaqsartý úshin josparly aldyn alý jumystaryn toqsan saıyn júrgizetinin málimdedi.

"Qurmetti abonentter, qazirgi kezde whats app messendjeri arqyly jerseriktik jáne efırlik teleradıohabar taratý jelilerinde josparly-aldyn alý jumystaryn júrgizýge qatysty "feık" aqparat taratylyp jatyr.

Dúrbeleńge berilmeýge jáne tek resmı aqparatqa ǵana senýge úndeımiz.

"Qazteleradıo" AQ toqsan saıyn jerseriktik jáne efırlik jelilerdiń tehnıkalyq quraldarynda servısterdi jaba otyryp, josparly-profılaktıkalyq jumystar júrgizedi. Bul jumystar teleradıo habarlaryn sapaly taratýdy qamtamasyz etý úshin qajet, al toqsan saıynǵy josparly-profılaktıkalyq jumystar servısti uzaq ýaqyt óshirýge múmkindik beredi, sondyqtan osy ýaqyt ishinde tehnıkalyq quraldardy jańǵyrtý boıynsha qosymsha jumystar da júzege asyrylady" dep jazylǵan operator saıtynda.

Josparly-tehnıkalyq jumystardyń ótkiziletini týraly aqparatty aqparat jáne qoǵamdyq damý mınıstrligi rastady.

– Qazir jelilerde túrli jalǵan aqparat taratylýda. Naqtyraq aıtqanda josparly aldyn alý jumystary týraly aqparattyq habarlamalar. Keıbir aqparattyq habarlamalar shyndyqqa janaspaıdy. Osy josparly aldyn alý jumystary týraly aqparatty osydan birneshe kún buryn Qazaqstan Respýblıkasynyń habar taratý salasyndaǵy ulttyq operator Qazteleradıo taratqan bolatyn. Osy aqparatqa sáıkes, "Qazteleradıo" AQ toqsan saıyn jerseriktik jáne efırlik jelilerdi tehnıkalyq quraldaryna servısterdi jaba otyryp, josparly profılaktıkalyq jumystardy júrgizedi. Iaǵnı bul jumystar teleradıohabarlaryn sapaly taratýdy qamtamasyz etý úshin qajet jáne toqsan saıynǵy josparly profılaktıkalyq jumystar servısti uzaq ýaqyt óshirýge múmkindik beredi. Sondyqtan osy ýaqyt ishinde tehnıkalyq quraldardy jańǵyrtý boıynsha qosymsha jumystardy júrgizedi, – dep málimdedi QR AQDM resmı ókili Maksım Rojın.

Eske sala keteıik, Qazaqstanda qasaqana jalǵan aqparat taratqan úshin qylmystyq jaýapkershilik qarastyrylǵan.

– Feık jáne qasaqana jalǵan aqparat taratý zańmen jazalanady. Aqparatty basqaǵa jibermes buryn onyń resmı jáne shynaıy ekenin tekserý kerek. Tek resmı derekkózderge ǵana senińizder, – dep túıindedi Rojın.