Almaty oblysy Eńbekshiqazaq aýdanyna qarasty Órnek aýylynda tapa tal túste jas kelinshekti óltirip, máıitin órtep jibergen kúdikti anyqtaldy. Bul týraly jergilikti polısıa habarlady.

Qaıǵyly oqıǵa 20 tamyz kúni bolǵan. Kelinshek birneshe saǵat boıy úıge oralmaǵan soń jaqyndary quqyq qorǵaýshylarǵa habar berip, ózderi de izdeýge kirisip ketken. Biraq táýlik ótken soń 21 jastaǵy kelinshektiń denesi aýyl shetinen tabylǵan.

Jas kelinshek áke-sheshesiniń úıinen shyǵyp, kúıeýiniń jeke qojalyǵyna ketip bara jatqan jolda qaıtys bolǵan. Kúdikti kelinshekti tunshyqtyryp, sýǵa batyryp ketken. Keıinnen oqıǵa ornyna qaıtyp kelip máıitti órtep jibergeni belgili boldy.

– Kisi óltirdi degen kúdikpen atalǵan aýyldyń 28 jastaǵy turǵyny ustaldy. Buryn kisi tonaǵany úshin qylmystyq jaýapkershilikke tartylǵan jáne qazir esh jerde jumys istemeıtini anyqtaldy. Kúdikti ýaqytsha ustaý ızolátoryna qamaýǵa alyndy, – dedi oblystyń polısıa departamentiniń resmı ókili Aqbota Qýanyshbekqyzy.

– Osyǵan deıin artyq qylyǵyn baıqamadym. Aýyldastarmen jaqsy aralasatyn. Nur-Sultanǵa baryp jumys istep keldi. Mynadaı iske baratynyn bilmedim. Jaǵdaıda estigende senbeı qaldym, – dep aıtty aýyl turǵyny Ilham Jılelov.

Atalǵan derek boıynsha QR qylmystyq kodeksiniń 99-baby 1-bóligi boıynsha (adam óltirý) is qozǵalyp, sotqa deıingi tergeý jumystary bastaldy.