Bilim jáne ǵylym mınıstri Asqat Aımaǵambetov 1 qyrkúıekte oqýshylar qashyqtan qalaı oqıtynyn aıtty. Bul týraly ol ortalyq komýnıkasıalar qyzmetinde ótken onlaın brıfıńte málimdedi.

– Oqý jyly epıdemıologıalyq jaǵdaıǵa baılanysty qashyqtan oqý formatynda bolady. Eki erekshelik bar:

Kezekshi synyptardyń jumysy. 1–4 synyptarǵa baılanysty, ata-analardyń óziniń derbes sheshimi bolsa, osyndaı kezekshi synyptar uıymdastyrylatyn bolady.

Shalǵaıdaǵy aýyldardaǵy shaǵyn jınaqtalǵan mektepter. Epıdemıologıalyq ahýal jaqsy bolsa, dástúrli formatta oqýǵa bolady.

Tamyz aıynyń sońyna qaraı derekterge sáıkes, jalpy oqýshylardyń 80%-y (2,6 mln oqýshy) qashyqtan oqytylady. 15%-y (ata-analar ótinishteri boıynsha) kezekshi synyptarǵa barady. Bul degen 530 myń bala jáne 5%-y dástúrli formatta oqıtyn bolady. Shaǵyn jınaqty mektepterde oqıtyn balalar sany - 202 myń bala, – dedi Aımaǵambetov.

Mınıstr qashyqtan oqytý boıynsha eki negizgi baǵytty aıtty.

– Arnaıy ınternet-platformalar arqyly oqytý. Platformalardyń yńǵaıyna baılanysty mektepter, qalalyq, aýdandyq mektepter bilim bólimderi sheshim qabyldady.

"El Arna" jáne "Balapan" telearnalary arqyly beriletin telesabaqtar, qazir 9 saǵatqa deıin efır berilip otyr, – dedi ol.

Ol óz sózinde ata-analardyń derbes sheshimi boıynsha kezekshi synyptar uıymdastyrylatyn bolatynyn atap ótti.

– Úzilister ár synyp úshin ár túrli ýaqytta bolady. Sabaq uzaqtyǵy – 40 mınýtqa deıin. Balalar bir kabınette oqytylady. Synyptarda dezınfeksıalyq sharalar júrgiziletin bolady, – dep atap aıtty mınıstr.