Shvesıanyń Malme qalasynda ıslamǵa qarsy belsendiler Quran kitapty órtep, vıdeoǵa túsirgen. Buǵan jaýap retinde úsh júzge jýyq musylman qala kóshelerine shyǵyp, kólik qozǵalysyn jaýyp, ot jaqqan. Bul týraly Rossıa 24 arnasy habarlady. 

Shvesıada birneshe kún buryn kóshe sýretshisi atanyp ketken Dan Park esimdi azamat Danıanyń "Qatań kelisim" (Stram Kurs) partıasynyń jetekshisi, advokat Rasmýs Palýdanmen birge Malme bıliginen manıfes ótkizýge ruqsat suraǵan. Aksıa barysynda qasıetti quran kitapty órteýdi de josparlaǵan.

Buǵan deıin de etnıkalyq arazdyqty qozdyrǵany úshin sottalǵan arandatýshynyń bul ótinishine kelisim bermegen. Artynsha Danıamen shekarada ustalyp qalǵan advokat Palýǵa Shvesıa terıtorıasyna kirýge tyıym salynady. Alaıda soǵan qaramastan  partıa músheleri josparlaryn júzege asyryp, Quran kitabyn órtep jatqan vıdeolarymen bólisken.

Bul jaǵdaı eldiń ishinde búliktiń shyǵýyna sebepker boldy. Ashýǵa boı aldyrǵan 300-ge jýyq azamat Amıralsgatan men Shelegatan kósheleriniń qıylysynda kólik qozǵalysyn jaýyp, órt qoıypty. Dál sol jerde narazy top dóńgelekter men aǵash materıaldaryn laqtyryp, olardy toqtatpaq bolǵan polısıa qyzmetkerlerine bótelkeler, tastar jáne otshashýlar laqtyrǵan.

"Qatal kelisim" – ıslamǵa tyıym salýdy jáne barlyq "batystyq emes" adamdardy Danıadan shyǵarýdy qoldaıtyn partıa sanalady.