Prezıdent Qasym-Jomart Toqaev parlament palatalarynyń birlesken otyrysynda Qazaqstan halqyna jyl saıynǵy dástúrli joldaýynda pandemıa kezindegi bilim berý júıesine qatysty syn aıtty. 

– Qashyqtan oqytý isin uıymdastyrýda úkimettiń jibergen qateligin jaqsy bilemiz. Ashyǵyn aıtqanda áli kúnge deıin bir onlaın platforma joq. Muǵalimder, oqýshylar jáne ata-analar kúndiz-túni whatsapp-tan bas kótermeıtin boldy. Tolyqqandy oqý úderisi úshin qajetti barlyq fýnksıalary bar birińǵaı onlaın bilim berý plaformasyn shuǵyl ázirleý qajet. Sapaly bilim alý úshin ádettegideı sabaqqa qatysyp, muǵalimdermen, synyptastarmen aralasýdyń orny bólek. Sanıtarly talaptardy saqtaı otyryp, bilim alýdyń qalyptasqan dástúrli tásiline qaıta kóshýdiń tártibin ázirlegen jón.  Bul ásirese mektepter úshin mańyzdy. Kúndelikti máselelerdi sheshýmen qatar, balalardyń bárine birdeı múmkindik týǵyzý úshin júıeli sharalar qabyldaý qajet. Balalarymyz qaı jerde tursa da, qandaı tilde oqysa da sapaly bilim alýy kerek,- dedi prezıdent.

Qasym-Jomart Toqaev sonymen qatar ustazdardyń jalaqysyn 25%-ǵa arttyrý týraly sheshim qabyldaǵanyn málimdedi. 

Bilim salasyndaǵy máselelerdiń biri - ustazdar jalaqysynyń azdyǵy. Men 2021 jyldyń qańtar aıynan bastap muǵalimderdiń eńbekaqysyn jıyrma bes paıyzǵa kóbeıtý jóninde sheshim qabyldadym. Jalaqy mólsheri aldaǵy ýaqytta da arta beredi. Bul maqsatqa aldaǵy úsh jylda qosymsha 1,2 trıllıon teńge bólinedi.