Almatydaǵy ulttyq baspasóz klýbynda «Kósh kerýeni keri burylmasyn» degen atpen baspasóz máslıhaty ótti. Muhtar Shahanov,Qabdesh Jumadilov, Zardyhan Qınaıat, Asyly Osman, Rahym Aıyp bastaǵan qoǵam qaıratkerleri Elbasynyń qaraýyna jiberilgen «Kóshi-qon» týraly zańnyń ózgeristerine narazylyqtaryn aıtty. Ásirese shetelden keletin etnıkalyq qazaqtardyń jat jurttyqtarmen teńesip, azamattyq alýdan 5 jylǵa deıin shettetiletinin «múldem túsiniksiz jaǵdaıǵa» teńedi.

Rahym Aıypulynyń aıtýynsha, kóshi-qon bastalǵan sonaý táýelsizdik jyldarynan beri oralmandarǵa qarastyrylǵan jeńildikter birte-birte qumǵa sińgen sýdaı bolyp, «kózi joıylyp jatqan» kórinedi. Iaǵnı etnıkalyq qazaqtardyń atajurtyna kelgennen keıingi tirkelýi, áleýmettik jeńildikterden paıdalanýy, azamattyq alýy ýaqyt ozǵan saıyn qıamet qaıymǵa aınalǵan. Endi mine qazaq úkimeti «Qazaq kóshin» bir jolata toqtatatyn qadamǵa barǵaly otyr. Bul Elbasynyń kósh-qon saıasatynyń bedelin túsirip, eli ishinde de, halyqarada da memlekettiń abyroıyn aırandaı tógetin qıturqy tirlik.

Asyly Osman apamyz Elbasynyń bul Zańǵa qol qoımaıtynyna senetindigin jetkizdi. Óıtkeni táýelsizdikten keıingi «Uly kóshtiń» avtory «Ult kóshbasshynyń» ózi. Atalmysh zańǵa engizilgen sońǵy ózgerister Elbasyna, eldiń saıasatyna, búgingi jetistigine kóz alartatyn at tóbelindeı tobyrdyń áreketi bolýy múmkin ekendigin aıtqan eks-depýtat búgingi Parlamentte otyrǵan halyq qalaýlylarynyń óz qyzmetterine laıyq emes ekendigine nalydy. Ózbek Halmuradovtan basqa qazaq múddesin joqtaıtyn depýtat joq pa dep ashynda Asyly apamyz.

Al Qabdesh Jumadilov bastaǵan aqsaqaldarymyz ataly sózin aıtyp, búgingi bıliktiń ne úshin qazaqqa qarsy jumys jasap jatqandyǵyna, táýelsizdiktiń erteńine tikeleı qatysty dúnıelerge osynshama «dushpandyq» kórsetetine túsinbeıtindikterin jetkizdi. Aqyn Muhtar Shahanov «Qazaq kóshiniń» jalpy ult bolashaǵyna tikeleı qatysty ekendigin, sondyqtan barlyq ultshyldar birlesip, qazaq halqynyń aldyn kes-kestegen osyndaı qıturqy tirlikterge bir jaǵadan bas, bir jeńnen qol shyǵaryp qarsy turý kerektigin aıtty. Kóshi-qon máselesin jilikteı biletin tarıhshy Zardyhan Qınaıat aqsaqaldyń sózi jınalǵan jurttyń kóńilinen shyqty.  «1990 jyldary qazaq álsirep qalǵan ult bolatyn ıaǵnı qurýdyń az aldynda qalyp edi. Menińshe, qazaq memleketiniń búgingi kúnge jetýine úsh nárse tikeleı sebep boldy. Birinshisi, 1986 jylǵy jeltoqsan kóterilisi. Ekinshisi, táýelsizdik alýymyz. Úshinshisi, qazaq kóshi», - dedi Zardyhan aqsaqal. Al eldigimizdi bekemdegen «Uly kóshke» búgingi jetken, jetisken shaǵymyzda núkte qoıý ol eshqandaı qısynǵa sımaıtyn dúnıe dedi kásimbı tarıhshy.

Bir áttegen-aıy, atalǵan jıynǵa tek táýelsiz basylym jýrnalıseri men KTK, 31 telearna tilshileri qatysty. Ult bolashaǵyna tikeleı qatysty osyndaı máselege memleket qarjylandyratyn  ulttyq basylymdardyń, ulttyq telearnanyń bas aýyrtpaýy jıylǵan jurttyń renishin týdyrdy.

Baspasóz máslıhatyna jınalǵandar endigi kezekte Elbasy Nursultan Nazarbaevqa qazaq zıalylarynyń atynan ashyq hat jazyp, odan nátıje shyqpasa alda ótetin ultshyldar jınalysynda tıisti sheshimder qabyldaıtyn bolyp tarasty. «Ashyq hat» mátinin erteń jarıalaıtyn bolamyz.