Almaty qalasynyń óńirlik komýnıkasıalar qyzmetiniń alańynda Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamentiniń basshysy – qalanyń bas memlekettik sanıtar dárigeri Jandarbek Bekshın jáne Almaty qalasy Qoǵamdyq densaýlyq saqtaý Basqarmasynyń bastyǵy Kamaljan Nadyrov sońǵy aqparattarmen bólisti.

«Negizgi reprodýktıvti san – bul aýrý adamnyń qansha adamǵa aýrý juqtyrǵanyn kórsetetin kórsetkish. İndettiń órship turǵan kezinde bul kórsetkish 4,7%-dan asqan, ıaǵnı bir adam tórt adamǵa deıin juqtyrýy múmkin degen sóz. Búgingi tańda bul kórsetkish 0,9% tómendedi. Iaǵnı, bul kórsetkishtiń kemigeni-aýrýdyń taralý deńgeıi azaıǵanyn jáne epıdemıanyń qaýipi tómendegenin bildiredi», — dep habarlady J. Bekshın.

Ol sonymen qatar, qalanyń epıdemıologtary tarapynan aýrýdyń sebep-saldarlyq baılanysyna zertteý júrgizip jatqandyǵyn aıtty. Zertteý nátıjesi boıynsha, 49,7% jaǵdaıda adamdar naýqaspen jumysta, 19,5% jaǵdaıda naýqaspen úıdegi oshaq boıynsha baılanysta bolǵan. Tek 0,1% jaǵdaıda ǵana naýqaspen baılanys stasonarda bolǵandyǵy anyqtaldy.
Búgingi tańda qalada medısına baqylaýynda turǵan, úı karantınin saqtaýy tıis 1389 belsendi oshaqtar bar. Ol jerlerde medısınalyq baqylaý júrgizý, sonymen birge úı karantıni jalǵasýda. Epıdemıologtar aýrýmen baılanysta bolǵan adamdardyń sanyn anyqtady. Ol adamdar qazir qatań baqylaýda.

«Biz úıde karantınde otyrǵan adamdardy baqylaıtyn sharalar engizdik. Karantın rejımin saqtaýy tıis alamdar sany 1300-ge jetti. Baqylaý qońyraý shalý arqyly júzege asyrylady. Monıtorıńtik toptar úıge de barady jáne zań buzýshylyqtar anyqtalǵan jaǵdaıda, ıaǵnı eger olar úı karantıninde bolmasa, ákimshilik sharalar qoldanylatyn bolady», — dedi J. Bekshın.

Ol eger úıde karantın rejımin buzǵan adamnyń basqa adamdarǵa aýrý juqtyrǵany anyqtalsa, onda sońǵy baılanysta bolǵan adamǵa qylmystyq jaza qarastyrylǵanyn atap ótti.

«Karantındik stasıonarǵa oqshaýlaý rejımin buzýshylar ǵana emes, sonymen qatar úıde karantınde otyrǵandar da óz erkimen júgine alady. Eger úıde oqshaýlanýdyń eshqandaı múmkindigi bolmasa nemese úıde álsiz toptaǵy adamdar bolsa, onda óz erkimen oqshaýlaý aýrýhanasyna ornalasýǵa ótinish bere alady», — dep tolyqtyrdy spıker.

Atalǵan aldyn alý sharasy úıdegi karantın rejımin buzýdy toqtatý úshin jasalyp otyrǵanyn atap ótti.

J. Bekshınniń aıtýynsha, buǵan qala turǵyndarynyń ótinishteri sebep bolǵan. Óıtkeni úıde karantınde otyrýǵa tıis jandar úıde otyrmaǵan. Jaqynda eki júzge jýyq úı tekserilip, onda 23 naýqastyń joq ekendigi anyqtaldy.

«Bul sharalar aýrýdyń taralý tizbegine áser etedi dep senemiz. Sońǵy aıda aýrý deńgeıiniń táýliktik ósimi 4,2% -dan 1,4% -ǵa deıin tómendedi», — dep atap ótti J. Bekshın.

Aǵymdaǵy jyldyń 7 tamyzyndaǵy sońǵy aqparat boıynsha Almaty qalasynda koronavırýs juqtyrýdyń 12 997 jaǵdaıy tirkeldi, onyń ishinde 7 897-ynda sımptom rastalsa, 5110-y sımptomsyz jaǵdaı.