Almatyda jedel járdem qyzmetine koronavırýs, JRVI jáne pnevmonıa belgileri boıynsha túsetin shaqyrtýlar 70%-ǵa tómendedi. Bul týraly Almaty qalasynyń Qoǵamdyq densaýlyq saqtaý Basqarmasynyń basshysy Kamaljan Nadyrov óńirlik komýnıkasıalar qyzmetiniń alańyndaǵy onlaın-brıfıng barysynda aıtty.

Brıfıń barysynda K. Nadyrov koronavırýstyq ınfeksıamen kúresý úshin qabyldanǵan sharalar qazirgi jaǵdaıǵa oń áser etkenin atap ótti.

«Jedel járdem qyzmetiniń jumysyna túsken kúsh tómendegeni baıqalady. JRVI, KVI jáne pnevmonıaǵa shaǵym aıtýshylardyń sany 70%-ǵa tómendedi. İndettiń naǵyz órshigen tusynda árbir ekinshi qońyraý koronavırýs belgileri boıynsha tústi. Búginde kovıd jáne pnevmonıa belgileri boıynsha túsetin shaǵymdar sany 10-11%-dan aspaıdy», — dedi Kamaljan Nadyrov.

Esterińizge sala keteıik, buǵan deıin Almatyda naýqastardy aýrýhanaǵa jatqyzý algorıtmine bólý júıesin engizý arqyly ózgerister engizilgen bolatyn. Iaǵnı, qazir naýqastardy gospıtalızasıalaý medısınalyq mekemelerde bos oryndardyń bolýyna qaraı emes, kerisinshe naýqastyń aýrýynyń aýyrlyǵyna baılanysty bólinedi. Jeńil jáne sımptomy bilinbeıtin koronavırýsy bar naýqastar úıde em alady.

«Búginde úıde 1268 adam medısınalyq baqylaýda. Onyń ishinde sımptomy bilinbeıtinder – 667, al 601-y jeńil dárejedegi naýqastar. Sońǵy eki aptada osy sanattaǵy naýqastardyń sany (ambýlatorıalyq emde) 50%-ǵa azaıdy», — dep túıindedi Kamaljan Nadyrov.

Aýrý deńgeıiniń tómendeýine qaramastan, COVID-19-ben kúresý úshin AMSK deńgeıinde áleýetti arttyrý jumystary jalǵasýda. Maýsymda mobıldi toptardyń sany 72 bolsa, búginde olardyń sany 296-ny quraıdy. Aýrýmen kúresýge jumyldyrylǵan mamandar sany 5 esege artyp, 925 dárigerdi qurady. Jalpy, sońǵy eki aptada emhanaǵa kelýshiler sany 30% -ǵa tómendedi.