Búgin Almaty ákimi B. Saǵyntaev jáne zıaly qaýym ókilderi Abaı eskertkishine gúl shoqtaryn qoıdy. Bul rásim Abaıdyń týǵan kúnine oraılastyrylǵan, endi bıylǵy jyldan bastap aqynnyń týǵan kúni atalyp ótetin bolady.

Saltanatty sharaǵa jazýshylar men aqyndar Oljas Súleımenov, Murat Áýezov, Rollan Seısenbaev, Baqytjan Qanapıanov jáne basqalary qatysty.

«Abaıdyń týǵan kúni resmı mereke bolyp belgilendi. Bul kún qazaqtyń mádenıetin, ádebıeti men poezıasyn beıneleıdi. Prezıdent jarıalaǵan uly oıshyl jáne jazýshynyń 175 jyldyǵy aqynnyń poetıkalyq, fılosofıalyq eńbekteriniń ǵylymı-zertteý jumysyn jandandyrmaq. Abaıdyń murasy áli zerttelý kerek. Bul rette Uly Abaı aıtqan prınsıpter, ıaǵnı eńbekqorlyq, bilimge degen qushtarlyq, adamzatty súıý men oı tazalyǵy týraly pikirleri ózektiligin joımaıdy. Abaı kúni qutty bolsyn!», — dep jazdy Almaty ákimi B. Saǵyntaev Instagram-daǵy óziniń paraqshasynda.