20 jyldan astam ýaqyt boıy atalmysh kompanıa sút jáne sút ónimderin óndirýmen aınalysady. 80 túrli taýar óndiredi.
İs sapar barysynda Asqar Mamın SHQO ákimi Danıal Ahmetovpen birge «Vostok-Moloko» kásipornyna baryp qaıtty.
Qazaqstandaǵy sút óndirý salasynyń joǵary potensıalyn eskergen aımaq basshysy osydan birneshe jyl buryn osy kásipti damytý týraly usynys bildirgen bolatyn.
«Vostok-Moloko» JSHS-nyń bas dırektory Seıljan Saılaýbaevtyń málimetinshe, elimizdegi sút jetispeýshiligi mıllıon tonnany quraıdy. Al munyń aldyn alý úshin kem degende 500-600 ferma ashý kerek. Qýanyshtysy sol, búginde iske qosylǵan fermalardyń sharýasy ońǵa basýda. Sharýalar kooperatıvter quryp, memleket tarapynan kórsetiletin qoldaýlardy tıimdi paıdalanyp, mal basyn kóbeıtýde. Sút óńdeý zaýyty basshysynyń aıtýynsha, búgingi kúni elimizdegi suranysty qamtamasyz etip qana qoımaı, ekonomıkany ilgeriletip, ónimderdi eksportqa shyǵarý jaǵyn da qarastyrý kerek.
Búgingi kúni zaýyt jylyna 100 tonna sút óńdeıdi. Alaıda kásiporynnyń qýattylyǵy eki ese kólemdegi sút óńdeýge jetedi. Sút qabyldaý pýnktteriniń jumysy jemisin berýde. Qazirgi kúni aýyl turǵyndary iri qara mal ósirýge kóńil bólýde.
Aıta keteıik, «Vostok-Moloko» JSHS óndiristik prosesterdi modernızasıalaýǵa aýqymdy qarjylyq ınvestısıa quıady. Basty maqsat – jańa tehnologıalardy engizý. Kásiporyn jyl saıyn sapaly ónim óndirý baıqaýlaryna qatysyp, «İrimshiktiń sapaly túrleri – 2014j» bas júldesin, «Maıdyń sapaly túrleri» kúmis medalin, «Paryz 2008» ıelendi. Sonymen qatar 10 jyl boıy Reseıde uıymdastyrylyp kele jatqan baıqaýdyń bas júldesin qoldan bergen emes.
Pikir qaldyrý