Almatyda Abaı kúnine oraı oqýshylar arasynda óleń oqýdan onlaın jarys ótip jatyr. Baıqaýǵa 8 aýdannan 100-den asa adam qatysqan. Oǵan qosa, qala ákimdigi tuńǵysh ret hákimniń qara sózderin birinen-biri ilip alyp ketetin estafetany bastady.

24 jastaǵy Bahtınur bolashaq terapevt dáriger. Qazir jedel járdem qyzmetinde jumys isteıdi. Poezıaǵa degen yqylasy 2-synyptan bastalǵan. Sodan beri Abaıdyń óleńderin oqyp, jattaǵanda jany súıedi. Abaı oqýlaryna da qatysyp, baǵyn synap kórgen. Júldeli orynǵa jetpese de, Bahtınur súıikti isin tastaǵan emes. Rýhanı qundylyqty dáripteıtin Abaı kúni bolǵany úshin qýanady.

«Qazirgi jastarda qundylyq basqa nárse bolyp ketip jatyr. Abaı kúnin belgilegeni óte durys dep sanaımyn. Sebebi, osy kún arqyly jastarymyz poezıany bilýge nemese aqyndarymyzdy bilýge, olardy dáripteýge at salysyp, soǵan kúsh shyǵaryp, eń bolmasa eske alyp turatyn kún bolady», – dedi Qazaqstan Uıǵyr jastar birliginiń múshesi Bahtınur Sydyqova.

Ulty orys Galına qazaqshaǵa sýdaı. Semeıdiń týmasy qasıetti óńirdiń qasıeti erte jastan boıyna bitken deıdi. Kemeńger tulǵanyń shyǵarmasyn jetik bilý ár azamattyń paryzy dep biledi. Mektep qabyrǵasynan bastap joǵary oqý ornynda da Abaıdyń óleńderin oqýdan saıysqa túsip keledi.

«Jastaıymnan meni atam ádebıetke ıtermelep, qulshynysymdy oıatty. Qazaq tilinde Abaıdyń óleńin oqyp, ary qaraı neshe túrli saıystarǵa qatysqanda ózimniń talpynysymdy bildiretinmin. Men 10-nan astam óleńin jatqa bilemin. Oqysam kóbin eske túsire alamyn. Saıysqa qatysqanda qara sózderiniń shýmaqtaryn da jattap turatynmyn», – dedi Orys ulttyq mádenı ortalyǵynyń múshesi Galına Dýrachenko.

Aıta keteıik, Almatyda 1995-shi jyldan bastap mektep oqýshylary arasynda "Abaı oqýlary" ótedi. Jyl saıyn saıysqa myńnan asa adam qatysady. Baıqaýdy joǵary oqý oryndarynan, teatrdan kelgen ókilder ádilqazylyq etedi. Al bıyl "Abaı kúninde" qala ákimdigi pandemıaǵa baılanysty onlaın jarys uıymdastyrdy.

«Endi 10 tamyz Abaı kúni bolyp belgilengennen keıin árıne, úlken bir qazaqtyń rýhyn kóteretin keremet bir atalyp ótetin kún bolý kerek. Balalar ózderi oqyǵan vıdeony júktep, bizge jiberedi. Aýdan basshylaryna jiberedi. Aýdandaǵy kezegi ótken soń aýdannyń jeńimpazyn qalalyq kezeńge jiberedi. Daýys berý arqyly jeńimpazdy anyqtaıtyn bolamyz. Eshqandaı, eshkimniń kómegi qajet bolmaıdy», – dedi Qalalyq bilim basqarmasynyń bólim basshysy Nurgúl Taý.

Onlaın jarys jeńimpazyna planshet syıǵa beriledi deıdi uıymdastyrýshylar. Al hákimniń qara sózderin oqý estafetasyna kez kelgen uıym qatysa alady. Mundaǵy maqsat, ǵalamtorǵa telmirgen jastarǵa 45 sózdi jattatqyzý deıdi.