Memleket basshysy Qasym-Jomart Toqaev İshki ister mınıstri Erlan Turǵymbaevty qabyldady. Bul týraly Aqorda habarlady.

Qasym-Jomart Toqaevqa Prezıdenttiń bıylǵy Qazaqstan halqyna arnaǵan "Jańa jaǵdaıdaǵy Qazaqstan: is-qımyl kezeńi" Joldaýyn júzege asyrý, atap aıtqanda, tótenshe jaǵdaı komıtetin İshki ister mınıstrliginiń quramynan bólý jumystary jaıynda baıandaldy.

Mınıstrdiń aıtýynsha, búginde arnaıy komısıa qurylyp, aldaǵy ýaqytta Tótenshe jaǵdaılar jónindegi mınıstrliktiń quramynda qyzmet etetin 25 myńǵa jýyq adamnyń tizimi naqtylanyp, qajetti tehnıkalar men qural-jabdyqtar bólinip jatyr. Bul jumystardyń barlyǵy bir aıdyń ishinde aıaqtalady.

Sonymen qatar Erlan Turǵymbaev "polısıa qadamdyq qoljetimdilikte" qaǵıdaty boıynsha reformalaý jumysynyń barysy týraly aıtty. Mınıstr atalǵan qaǵıdat boıynsha jergilikti polısıa qyzmetkerleri materıaldyq turǵydan tolyq jabdyqtalyp, olardyń respýblıkanyń barlyq aýmaǵynda halyqpen tyǵyz jumys isteýine ońtaıly jaǵdaı jasalatynyn jetkizdi. Osy maqsatta ýchaskelik polısıa qyzmetkerleriniń mártebesi zańmen bekitilip, olar avtokólikpen, foto-vıdeo baqylaý qurylǵylarymen, elektrondy planshettermen qamtamasyz etiledi.

Budan bólek kezdesýde İshki ister mınıstrliginiń jumysyn sıfrlandyrý máselesi de qozǵaldy. Qazirdiń ózinde mınıstrlik jumysynyń 83% elektrondy formatqa kóshken. Jyl sońyna deıin bul mejeni 91% jetkizý kózdelip otyr.

Kezdesý sońynda Prezıdent Qasym-Jomart Toqaev Erlan Turǵymbaevqa qolǵa alǵan reformalardy nátıjeli iske asyrý kerek ekenin aıtyp, mınıstrliktiń aldyna naqty mindetter qoıdy.