"Nur Otan"  partıasynyń jalpyrespýblıkalyq ishki saılaýynda daýys berýge sanaýly kúnder qaldy. Partıanyń baspasóz qyzmeti habarlaǵandaı, Elbasy Nursultan Nazarbaevtan keıin barlyq mınıstrler men óńirlerdiń ákimderi de "Praımerız" aqparattyq júıesinde avtorızasıalaý rásiminen ótti.

Buǵan deıin aıtylǵandaı, el tarıhynda alǵash ret daýys berý elektrondyq túrde ótedi. Partıa músheleri túrli formattardy – mobıldi qosymshany, primaries.kz veb-portalyn, ýchaskede onlaın-daýys berýdiń birin tańdaı alady. Sondaı-aq Internetke qol jetimdiligi joq aýdandarda búleten arqyly daýys berýge bolady.

Saılaý prosesiniń ashyqtyǵyn qamtamasyz etý úshin "bir daýys, bir JSN, bir mobıldi nómir jáne bir IP-adres" qaǵıdaty boıynsha arnaıy verıfıkasıa júıesi qoldanyldy. Daýys berýge eki ret qatysý múmkin emes. Bul jaǵdaıda saılaýshy birden birneshe kandıdatqa daýys bere alady.

Búginge deıin júıege partıanyń 700 myńǵa jýyq múshesi tirkelgen.

Partıa hatshysy Álibek Áldeneıdiń aıtýynsha, partıaishilik irikteý "Nur Otan"-ǵa jańa adamdardyń kelýine birden-bir sebepker boldy. Tamyz aıynyń ózinde 25 myń adam partıa qataryna qabyldanǵan.

"11 qyrkúıek pen 4 qazan aralyǵynda "Nur Otan" partıasyna múshelikke qabyldaý ýaqytsha toqtatyldy. Bul – partıaishilik irikteýde "óz" kandıdattaryna daýys bergizý úshin azamattardy partıaǵa kirýge májbúrleý faktileri jaıly shaǵymdardyń jıileýine baılanysty qabyldanǵan sheshim. Árıne, biz "Nur Otan" partıasynyń qatary jańa adamdarmen tolyqqanyna múddelimiz. Óıtkeni partıa quramynyń kásibı mamandarmen jańaryp otyrýy asa mańyzdy. Alaıda partıa qataryna qosylý árbir azamattyń sanaly túrde, óz qalaýymen júzege asýy tıis.
Partıaǵa qabyldaýdy ýaqytsha toqtatý sheshimi shyqqanǵa deıin 17,3 myń ótinish kelip túskenin aıta ketý kerek. Onyń ishinde 16,2 myń adam "Nur Otan" partıasyna qabyldandy. Al 1,1 myńǵa jýyq ótinish maquldanbady. Onyń ártúrli sebebi bar. Máselen, usynymdardyń bolmaýy men baǵdarlamalyq qujattardy bilmeý, tipti májbúrleý faktilerine deıin jiti zerdelendi. Partıa óz quramyn qoldan kóbeıtýge úzildi-kesildi qarsy. Kerisinshe, sońǵy ýaqytta partıamen baılanysty úzgen, qoǵamdyq belsendiligi tómen jáne basqa da sebeptermen "Nur Otan"-nyń quramynan partıalastar shyǵaryldy", - dedi Álibek Áldeneı.

Onyń aıtýynsha, osylaısha partıaishilik irikteý kezinde "Nur Otan" qataryna 41,2 myńǵa jýyq azamat qabyldanǵan. "Nur Otan" Hatshysy partıa qataryn jaqynda tolyqtyrǵandarǵa 1-3 qazan aralyǵynda onlaın-daýys berýge qatysý úshin tezdetip Primaries.kz portalynda tirkeýden ótýge keńes berdi.

Aıta keteıik, praımerızdiń basty maqsaty – aldaǵy Májilis pen barlyq deńgeıdegi máslıhattar saılaýyna partıalyq tizimderge engizý úshin qoǵamnyń senimi men qoldaýyna ıe bolǵan bedeldi partıa kóshbasshylaryn anyqtaý.

Tirkeý nátıjesi boıysha partıaishilik irikteýge 11 myńǵa jýyq úmitker qatysýda. Elimiz boıynsha orta eseppen bir orynǵa tórt adam úmitker bolyp otyr. Kandıdattardyń 70%-y ózin-ózi usynǵandar, al myńǵa jýyǵy – partıanyń jańa músheleri. 37%-y – áıelder, 29%-y – 35 jasqa deıingi jastar. Qatysýshylardyń ortasha jasy – 43 jas.

7 qyrkúıekten bastap praımerızge qatysýshylar 817 myńnan astam adamdy tikeleı qamtı otyryp, 36 myńnan asa úgit-nasıhat is-sharasyn ótkizdi. 14 qyrkúıekten bastap onlaın-formatta jarıa pikirsaıystar bastaldy. Onda qatysýshylar naqty eldi mekenderdiń túıindi máselelerin sheshý jónindegi óz paıymdaryn ortaǵa saldy. Birneshe kúnniń ishinde 11 myńnan asa talap-tilekter men usynys jınaldy

Kandıdattardyń reıtıńisi bar praımerızdiń qorytyndysy 5 qazanda jarıalanady dep kútilýde.