Belgili sportshy Qýat Hamıtov óziniń qalada dezınfeksıa jasap júrgendermen kúres júrgizý keregin, eshkimnen keshirim suramaǵanyn, sondaı-aq ustalǵannan keıin qalaı ashtyqqa ushyraǵanyn málimdedi. Bul týraly Fight Nights Global 98 týrnırinde jeńiske jetkennen keıin Reseıdiń YouTube-tegi "Ýshataıka: Sport-Ekspress" arnasyna ashyq suhbatynda aıtty.

– Bilesiz be, men bul taqyrypty kótergen kezde kóptegen adamdar meni esi aýysqan dep oılady. Biraq meniń aıtqanym ras nárse. Ýaqyt óte adamdar meniń durys aıtqanymdy túsinedi. Adamdar halyqty ýlaı bastaıdy, sodan soń jappaı aýyra bastaıdy. Sondyqtan men bul qorlyqty, aýrýdy toqtatqym keldi. Sebebi barlyq týystar, dostar eki-úsh kúnde aýyryp qaldy. Sondyqtan men bárine qandaı da bir jolmen toqtatý kerek ekenin aıttym. Kóshede dezınfeksıa jasap jatqandardy toqtatyp, qandaı suıyqtyqpen dezınfeksıa jasaıtyndyǵyn tekserińiz. Sebebi vırýstyń ózi kóshede júrmeıdi, aýada ushady. Al oǵan dezınfeksıa jasaý múmkin emes, – dedi sportshy.

Ol dezınfeksıa jasaıtyndarǵa aıtqan sózine emes, buǵan deıingi basqa málimdemeleri úshin de ustaldym dep oılaıdy. Sportshy eki kún qamaýda bolǵannan keıin bosatylǵan. Qamaýda qandaı jaǵdaıda bolǵanyn suhbatta baıandap berdi.

– Men túrmede otyrǵanda, múldem tamaq ishpedim, ash boldym. Olar maǵan tańǵy as, tamaq ákeldi. Biraq maǵan olar bergen tamaqty jeýge bolmaıtyn. Men eshteńe suramadym. Barlyq adamdar sekildi tynysh otyrdym. Osy eki kúnde qansha kılogramm salmaq tastaǵanymdy bilmeımin. Biraq qatty sharshadym.

Sonymen qatar, men táttilerdi óte jaqsy kóremin. Eger qant jemesem, "vampır" sıaqty bolyp ketemin. Olar túsirgen vıdeoda olar meni urǵan sekildi kórindi. Al shyn máninde, jekpe-jekke deıin 10-12 kún qalǵan edi. Salmaq qýdym, sharshadym. Sodan shashym osyndaı boldy. Sol sátte olar telefonǵa bildirmeı túsirip alǵan, sodan soń vıdeo taralyp ketti, – deıdi ol.

Sportshy eshkimnen keshirim suramaǵanyn aıtty.

– Kóptegen adamdar bireýden keshirim suraǵanymdy aıtady. Alaıda men eshkimnen keshirim suramadym. Men óz sózimnen qaıtpaımyn. Sonymen qatar, men halyqty ýlaýdy toqtatý kerek dep oılaımyn, – deıdi Qýat Hamıtov.