Qostanaı qalasynda QR premer-mınıstri Asqar Mamın men Tatarstan Prezıdenti Rýstam Mınnıhanov kelissóz júrgizip, Qazaqstanda 261 mlrd teńge ınvestısıaǵa úsh birlesken avtomobıl jasaý jobasyn iske asyrýdy bastap berdi. 

İske asatyn jobalar qatarynda mynalar bar: Qostanaı Indýstrıalyq aımaǵynda "KAMAZ" shoıyn quımasyn jáne júk tehnıkasynyń beldigine arnalǵan quramdas bólshekter óndirý zaýyttaryn salý, sondaı-aq Qaraǵandy oblysynyń Saran qalasynda avtomobıl shınalary óndirisin ashý.

Birlesken kásiporyndardyń jobalyq qýattylyǵy jylyna 40 myń quıylǵan komponentti (sılındr bloktary, sılındr bloktarynyń bastıekteri jáne júk avtomobılderine arnalǵan beldik karteriniń tutas quıylǵan arqalyqtary) jáne júk avtomobılderiniń jetekshi beldiginiń bas berilisteriniń 86 myń redýktoryn quraıdy. Investısıanyń jalpy kólemi — 150,7 mlrd teńge. Shektes salalardy eskere otyryp, shamamen 1 200 jańa jumys orny qurylady. Ónimdi jergiliktendirý deńgeıi 60-70%-ǵa jetedi. Zaýyttardy salýdy 2023 jyly aıaqtaý kózdelgen.

Jobalardy iske asyrý Qazaqstandy TMD naryǵyndaǵy júk tehnıkasyn iri óndirýshi jetkizýshilerdiń jahandyq tehnologıalyq tizbegine qosady — "KAMAZ" JAQ – ónimniń 95%-y eksporttalady.

A. Mamın men Tatarstan Prezıdenti R. Mınnıhanovtyń qatysýymen Qaraǵandy oblysynyń ákimdigi men "Tatneft" JAQ arasynda avtomobıl shınalaryn óndirý jobasyn Qaraǵandy oblysynyń Saran qalasynda iske asyrý týraly ınvestısıalyq memorandýmǵa qol qoıyldy.

Zaýyttyń óndiristik qýattylyǵy jeńil tehnıkaǵa arnalǵan 3 mln shına men komersıalyq tehnıka jáne avtobýstarǵa arnalǵan 500 myń shınany quraıdy. Munda 1 myńnan astam jańa jumys orny qurylady. Investısıanyń jalpy kólemi shamamen 111 mlrd teńgeni quraıdy. Jobany 2022 jyly iske asyrý josparlanǵan.

– Avtomobıl jasaý salasyndaǵy óndiris kólemi jyl basynan beri 51,8%-ǵa ulǵaıdy, negizgi kapıtalǵa salynǵan ınvestısıalar 6,6 eseden astamǵa – 9,4 mlrd teńgege deıin artty, — dedi A. Mamın.