Almaty qalasynyń Almaly aýdandyq sotynda Bank RBK-dan 144 mıllıard teńge urlady degen aıyptalýshyǵa qatysty sot otyrysy ótip jatyr. İstiń bas fıgýranty – belgili eks-bankır Jomart Ertaev sot zalynda barlyǵy úshin keshirim surady, dep habarlady Tengrinews.kz.

Buǵan deıin memlekettik aıyptaýshy sottan ony 11 jyl bas bostandyǵynan aıyrýdy suraǵan. Sottalýshy óziniń sońǵy sózinde jasaǵan qylmysyna ókinetinin aıtty. 

– Bul is men úshin 2017 jyly bastaldy, al 2018 jyldyń 8 mamyrynan bastap men qamaýda otyrmyn. Sodan beri kóp ýaqyt ótti. Aıtýǵa bolatyn barlyq nárse aıtyldy. Biz tergeýge jáne sizge, qurmetti sotqa, osy qıyn isti túsinýge kómektesýge tyrystyq. Biz muny jasadyq dep úmittenemin jáne siz birneshe jyl boıy bolǵan oqıǵalardyń naqty beınesin kóre aldyńyz.

Meniń oıymsha, sizge sottalýshylardyń kóbiniń bul iske qatysy bar ekeni anyq. Bul rette meniń rólimdi asyra baǵalaý jáne aqtap alý qıyn. Aqsha baqyt ákelmeıdi. Nátıjesinde men bárin joǵalttym: bostandyq, bedel, aqsha. Áli qoǵamda kóp jyldar boıy "Ertaevtyń qatesin qaıtalamańyz" dep aıtatyn shyǵar.

Árıne, men buǵan laıyqpyn. Óz mansabymnyń basynda men ózimdi baıytý mindetin qoımadym. Men ózimdi álemdi jaqsy jaqqa ózgerte alatyn mısıoner retinde kórdim. Biraq men ádemi ómirge qumar boldym.

Bostandyqqa shyqqanda nemen aınalysamyn? Bul suraq árdaıym meniń mıymda turady. Men ózim úshin jábirlenýshi tarappen túpkilikti esep aıyrysyp, onyń týystary men dostaryna qamqorlyq jasaý úshin bárin jasaımyn dep sheshtim.

Sońǵy sóz retinde men bárinen, eń aldymen týystarymnan jáne dostarymnan shyn júrekten keshirim suraımyn. Bizdi, aqymaqtardy keshirińizder. Ustamdylyǵy, qoldaýy jáne kásibıligi úshin qorǵaýshyma alǵys aıtqym keledi.

Qurmetti sot, advokatym ekeýmiz sotqa oń minezdeme bere almadyq. Bul qazir qanshalyqty tańǵalarlyq bolsa da, ótken ómirimde men shynymen maqtana alatyn kóp nárse bar. Men jahandyq bıznes-jobalardy qurýǵa qatystym, tórt kúndik jumys aptasyn engizdim, qaıyrymdylyqpen aınalystym. Kedeı otbasynda dúnıege keldim. Eden jýyp, qoı baǵyp, baraholkada jumys istedim. 

Anam meni protestanttyq etıka rýhynda tárbıeledi, onyń máni Qudaıǵa sený jáne eńbek. Men ıelik etken nemese basqarǵan kompanıalar árqashan únemi salyq tóleıtin. Sanaly ómirimde men 10 myńnan asa jumys ornyn qura aldym. Men adal jolmen aqsha taba alamyn. Men úshin olar qazir basty emes. Qazir tek jábirlenýshi tarappen esep aıyrysyp, balalarymdy aıaqqa turǵyzyp, baıandy ómir súrgim keldi, – dedi Jomart Ertaev sońǵy sózinde.

Bank RBK-dan 144 mıllıard teńge jymqyrý isine qatysty sot ótken jyldyń aıaǵynda bastalǵan. Tergeý derekterine súıensek, qylmys 2011-2017 jyldar aralyǵynda jasalǵan. Qylmystyq is 46 epızod jáne 700 tomnan turady. Aıyptaý aktisinde 3600-dan asa paraqsha bar.