Nur-Sultanda esinen tanǵan adamdy tonap ketti. Bul týraly Polisia.kz habarlady. 

57 jastaǵy er adamnyń aıtýynsha, ol Qarasaı batyr kóshesinen temirjol vokzalyna qaraı júrip, garajdardyń janynda kenetten esinen tanyp qalǵan. Ne sebepti talyp qalǵanyn azamat esine túsire almady.

Biraz ýaqyttan keıin jábirlenýshi esin jıyp, qasynda beıtanys eki er adam otyrǵanyn jáne onyń qaltalaryn tekserip jatqanyn kóredi. "Ne istep jatsyńdar?" dep suraǵanynda eki adam eki jaqtap ura bastaǵan. Olar qaltasyndaǵy 30 myń teńge men usaq-túıek zattardy alyp ketken.

Polısıa qyzmetkerleri jedel izdestirý barysynda kúdiktilerdi izdep, 26 jáne 36 jastaǵy qala turǵyndaryn ustady. Olar qazir ýaqytsha ustaý ızolátoryna ornalastyryldy. Ustalǵandardyń buryn sottalǵany jáne qylmystyq jaýapkershilikke tartylǵany anyqtaldy. Aıǵaqty zattar men qarajat tárkilenip, ıesine qaıtaryldy. 

Atalǵan derek boıynsha qylmystyq kodekstiń 191-baby (qaraqshylyq) boıynsha sotqa deıingi tergeý amaldary júrgizilip jatyr. Ustalǵan adamdardyń astana aýmaǵynda buryn jasalǵan osyndaı qylmystarǵa qatysy bar-joǵy anyqtalýda.