Bilim jáne ǵylym mınıstri Asqat Aımaǵambetov prezıdenttiń bilim salasyna qatysty tapsyrmalary qalaı oryndalatynyn málimdedi. Bul týraly ol áleýmettik jelidegi paraqshasynda jazdy.
– Memleket basshysy pedagogıkalyq mamandyqtarǵa túsetin abıtýrıentterge qoıylatyn talaptardy arttyrý jáne stıpendıa mólsherin 42 myń teńgege deıin ulǵaıtý tapsyrmasyn berdi. Ótken jyly stıpendıa mólsheri 21 myń teńgeni qurasa, Prezıdenttiń tapsyrmasynan keıin jeltoqsan aıynda 26 myń teńgege deıin ósti. Al 1 qyrkúıekten bastap bolashaq pedagogterdiń stıpendıasy 42 myń teńge mólsherinde bolyp otyr. Bul barlyq mamandyqtardyń ishindegi eń joǵarǵy stıpendıa bolady. Aıta keterligi, stýdentter kesheden beri osy stıpendıany ala bastady, – dedi mınıstr.
Onyń aıtýynsha, osy jyldyń maýsym aıynan bastap pedagogıkalyq mamandyqtarǵa túsý úshin shekti bal birden 70-ke deıin kóterilgen.
– "Pedagog mártebesi týraly" Zańdy qabyldaýdyń jáne atqarylyǵan sharalardyń arqasynda bıyl "Altyn belgi" tósbelgisi ıegerleriniń arasynda pedagogıkalyq mamandyqty tańdaǵandar sany 1,7 ese ósti, al kóptegen baǵyttar boıynsha ortasha bal 100-den asty. Eger birneshe jyl buryn pedagogıkalyq mamandyqqa túsýshilerdiń ortasha baly 65-ti qurasa jáne pedagog mamandyǵy túlekter arasynda kóp suranysqa ıe bolmasa, qazir joǵary bal jınaǵan myqty túlekter pedagogıkalyq baǵyttar boıynsha oqýǵa túse bastady.
Sondaı-aq UQSK qorytyndysy boıynsha berilgen tapsyrmalar aıasynda doktoranttardyń stıpendıasy 102 myńnan 150 myń teńgege deıin ósti. Mundaı shara jas ǵalymdardy qoldaý úshin óte mańyzdy, óıtkeni doktoranttardyń otbasylary bar jáne olar óz zertteýlerin júrgizýmen aınalysady, – dedi ol.
Budan bólek ol 2020 jyldyń qyrkúıek aıynan bastap memlekettik granttyń quny aıtarlyqtaı óskenin atap ótti.
– Bul joǵary oqý oryndaryna oqytýshylardyń jalaqysyn arttyryp, materıaldyq-tehnıkalyq bazasyn nyǵaıtýǵa múmkindik beredi. Prezıdenttiń Ulttyq qoǵamdyq senim keńesiniń qorytyndysy boıynsha bergen tapsyrmasynyń barlyǵy erekshe baqylaýda jáne belgilengen merzimde oryndalatyn bolady, – dep sózin túıindedi Aımaǵambetov.
Pikir qaldyrý