Qazaqstannyń tuńǵysh prezıdenti, qaýipsizdik keńesiniń tóraǵasy Nursultan Nazarbaev ishki ister mınıstri Erlan Turǵymbaevty qabyldady, dep habarlady elbasy.kz.

Kezdesýde ishki ister mınıstri qaýipsizdik keńesiniń tóraǵasyna karantın kezeńinde elde quqyqtyq tártipti qamtamasyz etý boıynsha qabyldanǵan sharalar, sondaı-aq jeke quramdy epıdemıadan qorǵaý jóninde málimet berdi.

Sonymen qatar ol ishki ister organdarynyń halyqpen ózara is-qımylyn jaqsartý, olardyń jumysynyń ashyqtyǵyn qamtamasyz etý boıynsha júrgizilip jatqan jumystar týraly da atap ótti. 

– Memlekettik organdardyń qoǵam údesinen shyǵa bilgeni jón. Jurtshylyqpen tikeleı dıalog ornatyp, azamattarmen keri baılanysty jaqsartý úshin qazirgi "platformalardyń" jumys formatyn qaıta qaraý qajet. Basty maqsat – halyqtyń quqyq qorǵaý júıesine degen senimin jáne onyń qyzmetiniń tıimdiligin arttyrý, – dedi Nursultan Nazarbaev.

Qaýipsizdik keńesiniń tóraǵasy prezıdenttiń jergilikti polısıa qyzmetin odan ári reformalaý jáne eldegi quqyqtyq tártipti qamtamasyz etý jónindegi tapsyrmalaryn sapaly oryndaýdyń mańyzdylyǵyn atap ótti.