Búgin «Nur Otan» partıasy Tóraǵasynyń birinshi orynbasary Baýyrjan Baıbek partıaishilik irikteý – paraımerızde daýys berdi. Bul týraly ol Facebook jelisindegi paraqshasynda jazdy.

«Praımerızde daýys berdim. Saılaý ýchaskesine arnaıy baryp óz tańdaýymdy jasadym. Bir jaǵynan daýys berý prosesiniń uıymdastyrylý deńgeıin de baıqap kórmek boldym.

Partıa Lıderi N.Á. Nazarbaevtyń tapsyrmasymen «Nur Otan»-nyń partıaishilik saılaýy elimizdiń partıalyq-saıası damý tarıhynda tuńǵysh ret respýblıkalyq aýqymda ótýde. Bul – Elbasy bastamasymen qolǵa alynǵan partıany «qaıta jandandyrýdy» túıindeıtin kezeńniń biri.

Búgingi tańda adamdar qoǵam ómirine belsendi atsalysqysy keledi. Ózgeristerge, jańa tulǵalar men tyń ıdeıalarǵa degen suranys arta túsýde. Elimizdiń jetekshi saıası kúshi retinde «Nur Otan» partıasy el suranysyn der kezinde qanaǵattandyryp otyr.

Bastapqyda týyndaǵan kúmánǵa qaramastan, búginde praımerızdiń óz deńgeıinde ótip jatqanyn nyq senimmen aıtýǵa tolyq negiz bar.

Jarıa túrdegi partıaishilik irikteý elimiz úshin sony saıası jańalyq retinde jurt qyzyǵýshylyǵyn týǵyzyp, 10 myńnan astam qatysýshy 60 myńnan astam kezdesý men pikirsaıys ótkizdi. İs-sharalar barysynda 1,4 mln. adam qamtyldy.

El Prezıdenti Q.K. Toqaevtyń "Halyq únine qulaq asatyn memleket" tujyrymdamasy aıasynda árbir óńir, qala men aýdan boıynsha jarıalanǵan 216 saılaýaldy baǵdarlamanyń jobasyna qatysty 20 myń usynys jınaldy. Turǵyndardy tolǵandyratyn taqyryptardyń alǵashqy bestigine – turǵyn úıdiń qoljetimdiligi, joldardy jóndeý, áleýmettik qoldaý, densaýlyq saqtaý men bilim salalarynyń deńgeıin arttyrý máseleleri kiredi. Elbasy tapsyrǵandaı, barlyq kóterilgen máselelerdi partıa erekshe baqylaýǵa alady.

«Praımerız» júıesinde elektrondy daýys berýge qatysý úshin 730 myńdaı partıa múshesi tirkeldi. Qazir 600 myńdaı adam daýys berdi, bulardyń ishinde dástúrli tásilmen (qaǵaz búletender arqyly) daýys berýshiler de bar.

Saıası qarbalas qyza túsetinin aldyn ala boljap, biz mamandardyń usynysy boıynsha daýys berý kezeńin úsh kúnge bóldik. Áıtse de, birinshi kúni tehnıkalyq qıyndyqtar týyndady, biz ony jyldam rettedik. Sonymen birge kandıdattardyń ótinishteri boıynsha daýys berýdi taǵy bir kúnge uzartý týraly sheshim qabyldandy (4 qazan kúngi saǵat 14.00-ge deıin). Bul – ádiletti sheshim boldy.

Elbasynyń praımerızdi ashyq, ádil ótkizý men barsha qatysýshyǵa birdeı múmkindik týǵyzý týraly tapsyrmasynyń Ortalyq apparat úshin mańyzy zor. Kim ekenine qaramastan, tártip buzýshylyqtarǵa der kezinde nazar aýdaryp, kandıdatty daýys berýden alyp tastaýǵa deıin shara qoldanyp, jumysty tyńǵylyqty uıymdastyryp otyrǵan Partıalyq baqylaý komıteti men onyń jergilikti jerlerdegi komısıalarynyń múshelerine alǵys aıtamyn.

Múmkindikti paıdalana otyryp, praımerızdiń barsha qatysýshylaryna kelesi máselelerdi aıta ketkim keledi.

Árıne, árkimniń óz kútken boljamy bar. Osy kezeńde kózdegen maqsatyna jete almaıtyndar da, jeńis tuǵyrynan kórinetinder de bolady. Degenmen bul jerde utqandar men utylǵandar joq. Bári de ıgilikke jetti. Bul is-shara eń aldymen elimiz úshin ıgi is boldy. Jetekshi partıada ashyq partıaishilik saılaý ótkize otyryp, sizdermen birge uzaq jyldar boıy jemisin beretin jańa saıası mádenıettiń negizin qaladyq. «Nur Otan» partıasynyń kóshbasshylyǵy osydan kórinedi.

Barsha úmitkerge sáttilik tileımin. Uıymdastyrý komıteti daýys berý nátıjelerin 6 qazanda jarıalaıdy», - dep jazdy partıa Tóraǵasynyń birinshi orynbasary.