Qyrǵyzstannyń astanasy Bishkekte parlament saılaýynyń ádil ótpegenin aıtqan narazy turǵyndardyń beıbit sherýi qaqtyǵysqa ulasty. Narazy top "Aq úıdi" basyp alyp, tergeý ızolátory men kolonıadaǵy eks-prezıdent Almazbek Atambaevty pen burynǵy premer-mınıstr Sapar Isaqovty jáne mınıstrler kabınetiniń eks-tóraǵasy Jantoro Satybaldıevty bosatty. Kórshi eldegi saıası jaǵdaıǵa Qazaqstan azamattary da beıjaı qarar emes. Qamshy tilshisi aıyrqalpaqty eldegi ahýalǵa áleýmettik jeli reaksıasyn usyndy.

"Jıi aýysa bergenine qulaq úırenip ketti"

Jýrnalıs Jazıra Begaly facebook paraqshasynda "ATAMBAEV QAITA PREZIDENT BOLA MA?" degen jazba jarıalap, óziniń Ystyqkólde kórgenderimen bólisti.

– Qazirgi memleket basshysy Sooronbaı Jeenbekov qashyp ketti. Ushyp ketti. Ol mingen áýe kemesiniń qaıda qonǵany jaıly aqparat joq.

Endi kórshi el taǵy ýaqytsha prezıdentsiz qaldy. Jıi aýysa bergenine qulaq úırenip ketti. Byltyr sol revolúsıa kezinde Ystyqkólde bolǵanda Aq úıdi qıratý, prezıdentti qýyp jiberý, órtep jiberý qyrǵyz aǵaıyndarǵa ońaı eken dep oıladym, – dep jazdy jýrnalıs.

Janbolat Mamaı, "Demokratıalyq partıa" bastamashyl tobynyń jetekshisi, saıasatker:

– Halqyna oq atpaǵan, bılikke tas keneshe jabyspaı, óz erkimen ketken prezıdentti eli qashan da qurmet tutady.

Qyrǵyzdardyń eń birinshi bolyp Atambaevty abaqtydan bosatqany da sondyqtan!

Gúlmıra Ábiqaı, jýrnalıs, telejúrgizýshi:

– Áý zamannan qoıymyz qoralas, malymyz aralas kórshi elmiz ǵoı, aman bolsyn Qyrǵyzdar! Ózim Atambaevtyń bostandyqqa shyqqanyna qýandym, ol prezıdent bolǵan az ýaqytta kórshi elde tártip ornap edi.

Esdáýlet Qyzyrbekuly, jýrnalıs:

– Qyrǵyzstanda endi Sapar Isakov prezıdent bolatyn shyǵar.

"Ortalyq Azıadaǵy túrkiniń jurty túleıtin zamanda tozǵany ókinishti"

Aıatjan Ahmetjanuly, QazBilim ortalyǵynyń  dırektory:

– Qyrǵyz bıliginiń de, demokratıasynyń da boǵy shyǵyp ketti. Aýyrlaý bolsa da shyndyǵy osy. Ult retinde qalyptaspaǵan qaýymǵa demokratıa apat ákeledi degen sóz bar edi. Iá, demokratıa qyrǵyz aǵaıynǵa apat ákelip tur. Áıtpese, taptalyp, órtelip, qıratylyp jatqan da óz qyrǵyzynyń múlki ekenin sol jurt bilýi kerek-ti. Prezıdentin qýyp jibergennen kósegesi kógermedi, kerisinshe ár joly ekonomıkalyq quldyraýǵa túsedi. Jańa prezıdenti eski prezıdentin sottaıdy... Iá, jurtqa kúler jaıymyz joq shyǵar, biraq, bir týǵan aǵaıyn qyrǵyzdyń tozýy, keri ketýi bizdiń el úshin de ókinishti. Ortalyq azıadaǵy túrkiniń jurty túleıtin zamanda tozǵany ókinishti. 2015 te Qyrǵyz elinde bolǵanda shyn janym ashyǵan edi, ózimiz úshin shúkir dep ketip edim. Taǵy keri ketý...

Serǵalı Balajan, jýrnalıs:

– 300 myń belarýs 3 aıdan beri jasaı almaǵandy 3 myń qyrǵyz 3-4 saǵatta tóńkerip tastady.

Erqanat Tursynjanuly, jeli belsendisi:

– Asqar Aqaev 61 jasynda, Qurmanbek Bakıev 61 jasynda, Roza Otynbaeva 61 jasynda, Almasbek Atambaev 61 jasynda prezıdenttikten ketipti jáne ketirdi. Bıyl Sooranbaı Jánibekov 61 jasta. Qalaı oılaısyzdar prezıdentten ketire me?