Prezıdent Qasym-Jomart Toqaevtyń baspasóz hatshysy Berik Ýálı Facebook-tegi paraqshasynda  Qyrǵyzstandaǵy qaqtyǵysqa qatysty málimdeme jasady.

– Qyrǵyzstanda bolyp jatqan oqıǵalar – sol eldiń ishki máselesi. Qazaqstanda baýyrlas Qyrǵyzstanmen ózara dástúrli dostyq qatynastardy jáne strategıalyq seriktestikti nyǵaıtý asa mańyzdy dep sanaıdy.

Sonymen qatar kórshiles eldegi ahýaldy turaqtandyrý isi Qyrǵyzstannyń Konstıtýsıasy men zańdaryna sáıkes júzege asyrylady dep úmittenedi. Qyrǵyz halqy óz memleketiniń uzaq merzimdi múddesi úshin kúrdeli jaǵdaıdan shyǵýdyń tıimdi jolyn tabady dep paıymdaıdy, – dep jazdy Berik Ýálı.

Eske sala keteıik, Qyrǵyzstanda 4 qazanda ótken parlament saılaýynyń nátıjesimen kelispegen azamattar Bishkekte narazylyq aksıasyna shyqqan. Aksıa sońy jappaı tártipsizdikke ulasyp, narazy top Aq úıdi basyp alǵan. Olar saılaý qorytyndysynyń kúshin joıyp, jańa saılaý ótkizýdi talap etýde.