Qazaqstan prezıdenti Qasym-Jomart Toqaev ana men balany qorǵaý máselesi týraly sóz qozǵady, dep habarlady Aqorda resmı saıty. 

– Úkimet medısınalyq kómektiń ózge túrlerin de kórsetýdi umytpaýǵa tıis. Ana men bala densaýlyǵyn qorǵaý – negizgi basymdyqtyń biri. Ókinishke qaraı, ana ólimi kórsetkishi barlyq óńirde birneshe ese kóbeıip ketti.

Byltyrǵy 8 aıda – 36 áıel qaıtys bolsa, bıylǵy 8 aıda – 131 áıel qaıtys bolypty. Mysaly, Aqtóbe oblysynda bul kórsetkish shamamen 13 ese, Qyzylorda oblysynda 9 ese, Shymkent qalasynda 7 ese artty. Nege bul adamdarǵa kómek kórsetilmedi? Qandaı sharalar qabyldanyp jatyr? Bul óte ózekti suraqtar. Olarǵa ákimder jaýap berý kerek.

Úkimetke óńirlermen birlesip, atalǵan faktilerdiń árqaısysyn tekserip, nátıjesin baıandaýdy tapsyramyn.

Ana men balany qorǵaý, onkologıalyq, kardıologıalyq, pýlmonologıalyq jáne medısınalyq kómektiń basqa da túrlerin kórsetý – el aldyndaǵy mindetimiz. Ákimderdi, jalpy Úkimetti bul mindetten eshkim bosatqan joq. Prezıdent ákimshiligine osy máseleni baqylaýǵa alýdy tapsyramyn, – dedi Toqaev koronavırýs indetiniń ekinshi kezeńine daıyndyq máseleleri boıynsha keńeste sóılegen sózinde.