"Túrkıa jumada Reseıde jasalǵan áýe qorǵanys júıesin synap, zymyrandardy qoldandy" dep málimdedi Amerıka Qurama Shtattarynyń resmı ókili. Nú-Iork Taımstyń aqparatynsha, bul áreket Tramp ákimshiligimen kelisimdi buzyp, kongrestiń Túrkıaǵa sanksıalar salý qaýpin tóndiredi.
Túrik áskerıleri Qara teńizdegi Sınop provınsıasynda "S-400" dep atalatyn áýe qorǵanys júıesin synaqtan ótkizdi, muny "A Haber" teledıdary aldymen habarlady jáne keıinirek aty-jónin aıtpaýdy ótingen AQSH sheneýnigi rastady. Reıters taratshan beınerolıkte aq tútin izi aspanda qalqyp júrgeni kóringen.
Túrkıa úkimeti tarapynan synaqtyń bastalǵany týraly resmı rastaý bolǵan joq. Biraq bul jańalyqty teristemedi de. Túrkıa zymyrandardy Sınopqa qaraı jyljytqany baıqalǵan jáne jaqyn arada birneshe synaq ótkizý úshin jaǵalaý mańyndaǵy áýe keńistigi men sýlardy shekteıtin habarlamalar jasalǵan.
Túrkıa prezıdenti Rejep Taıyp Erdoǵan ótken jyly Reseıden jetildirilgen "S-400" júıesin satyp alǵan. Degenmen bul áreket Túrkıanyń NATO-daǵy odaqtastary men AQSH-tyń shamyna tıgen. Bul júıe amerıkalyq "F-35" jasyryn bombalaýshy ushaqtaryna jáne batystyń basqa damyǵan qarý-jaraǵyna qarsy turýǵa baǵyttalǵan. Batystyq áskerı sheneýnikter "Túrkıanyń zymyrandy qoldanýy jaqyn mańdaǵy NATO ushaqtaryna qaýip tóndiredi" dep shaǵymdanýda.
