Shyǵys Qazaqstan oblysy Úrjar aýdany Maqanshy aýylyndaǵy polısıa bólimshesinde mal urlyǵy deregi boıynsha tergelip jatqan kúdikti qaıtys boldy. Bul týraly oblystyq polısıa departamentiniń baspasóz qyzmeti habarlady.

Departament baspasóz qyzmetiniń habarlaýynsha, vedomstvo basshysy Saǵat Mádıev jaǵdaıdy anyqtap tekserý úshin Maqanshyǵa kelgen.

– İshki ister mınıstriniń tapsyrmasy boıynsha oryn alǵan jaǵdaıdy anyqtap tekserý úshin arnaıy keldim. Maqanshy aýylynyń polısıa bólimshesinde 33 jastaǵy er adamnyń qaıtys bolǵanyn rastaımyn. Ol mal urlyǵy boıynsha kúdikti retinde polısıa bólimshesine jetkizilgen bolatyn, – dedi ol.
⠀
Saǵat Mádıevtiń basqarýymen arnaıy top quryldy. Oqıǵa boıynsha ózindik qaýipsizdik basqarmasy "Qınaý" baby boıynsha sotqa deıingi tergeý jumystaryn bastady. Prosesýaldyq prokýrorlardyń toby taǵaıyndaldy.
⠀
"Jaqyn týystarynyń qatysýymen oqıǵa ornyna qaraý júrgizildi. Qajetti saraptamalar, onyń ishinde patalogoanatomıalyq zertteýler ótkizildi, ázirge saraptama nátıjeleri daıyn emes. Qaıtys bolǵan azamattyń otbasyna Úrjar aýdanyń ákimimen birge baryp, onyń týystary men dostarynyń suraǵy qaralyp jatyr.

Jaqyn týystary men dostarynyń qaıǵysyna ortaqtasyp, kóńil aıtamyn. Kináli adamdar zańmen belgilengen jaýapkershilikke tartylady. Meniń prınsıptik ustanymym – tergeýdiń ádil, ári obektıvti júrgizilýi" dedi departament basshysy.

Áleýmettik jelide oqıǵaǵa qatysty vıdeo jarıalandy. Kadrdan "Eki balasy jetim qaldy", "Áıeline, sheshesine sizder ne dep aıtasyzdar? Biz óltirip tastadyq deısizder me?", "Súıegi qaıda? Aǵam qaıda?" degen sózder estiledi.