Almaty oblysy Qarasaı aýdandyq sotynyń sýdıasy Azat Azamatovty nelikten 10 jylǵa deıin sottaǵanyn túsindirdi.

Sýdıanyń aıtýynsha, Azamatovtyń kinási tolyǵymen kýágerlerdiń sózimen, saraptama qorytyndysymen dáleldengen.

– QR QK 345-baby 1-babynyń 4-bólimimen 10 jylǵa deıin bas bostandyǵynan aıyrý jazasy kózdelgen. Aıyptaý aktisinde jazany aýyrlatý jaǵdaılary aıtylmady. Bul jaǵdaılardy sot ózi alǵa tarta almaıdy. Soǵan baılanysty sot prokýrorǵa aıyptaý aktisine ózgeris engizý úshin qosymsha ýaqyt bergen bolatyn. Jańa aktide Polısıa basqarmasyna keltirilgen iri kólemdegi shyǵyn týraly jazylǵan. Sýdıa bul aýyrlatý jaǵdaılaryn eskere otyryp maksımaldy 10 jylǵa bas bostandyǵynan aıyrdy. Bul atalǵan bap boıynsha eń shekti jaza, – dedi sýdıa.

Sondaı-aq Azat Azamatov ómir boıy kólik aıdaý quqyǵynan aıryldy. Sot úkiminiń sheshimi boıynsha ol jábirlenýshilerge 66 mln teńge kóleminde moraldyq jáne materıaldyq ótemaqy berýge mindettelgen.

Qarasaı aýdandyq soty burynǵy polısıa qyzmetkeri Azat Azamatovty qylmystyq kodekstiń 345-babymen aıypty dep taýyp, 10 jylǵa bas bostandyǵynan aıyrǵan.

Qaıǵyly jol apaty osy jyldyń 25 mamyrynda tańerteń bolǵan. BMW kóliginiń mas júrgizýshisi Kóksaı shaǵyn aýdanyndaǵy blokpostty buzyp, patrúldik kólikke soǵylǵan. Kóliktegi eki polısıa qyzmetkeri de mert boldy. Onyń biri Jaras Janǵazıev oqıǵa ornynda qaza tapsa, áriptesi Dastan Ábdiqanov aýrýhanada kóz jumǵan edi.