Bákesekelestikti qorǵaý jáne damytý agenttigi zerthanalyq qyzmetter men jeke qorǵanys quraldarynyń baǵasy tómendegenin habarlady.

Agenttik taratqan aqparattyq habarlamada "prezıdenttiń "Jańa jaǵdaıdaǵy Qazaqstan: is-qımyl kezeńi" atty Qazaqstan halqyna Joldaýynda pandemıa jaǵdaıynda elimizde qalyptasqan kúrdeli jaǵdaıda azamattardyń áleýmettik kóńil-kúıiniń mańyzdylyǵyna erekshe nazar aýdarǵany aıtylǵan.

"Koronavırýstyń ekinshi tolqynyna daıyndyq maqsatynda Básekelestikti qorǵaý jáne damytý agenttigine baǵalardyń barabarlyǵyna taldaý júrgizý jáne zerthanalyq qyzmetter men jeke qorǵanys quraldarynyń baǵalyq saıasatyna monıtorıń júrgizý tapsyryldy.

Nátıjesinde PTR-test baǵasy 36 naryq sýbektisimen ashyq saýda-ótkizý saıasatyn kózdeıtin monopolıaǵa qarsy komplaens jasaý arqyly 18 000-nan 9 000-ǵa deıin tómendetildi ("Olımp "KDL" JSHS jáne "Invıvo" JSHS 9 myń teńgeden aspaıtyn baǵalardy belgiledi, "Suńqar" JSHS jáne "Áıgerim" JSHS jekelegen zerthanalary baǵalardy tıisinshe 6 000 jáne 7 000 teńgege deıin tómendetti).

Medısınalyq maskalardyń baǵasyn óndirýshiler orta eseppen  21 teńge/danaǵa deıin tómendetti, dıstrıbútorlar men bólshek saýda jelileriniń ústeme baǵasy óndirýshilermen, dıstrıbútorlarmen jáne bólshek saýda jelilerimen monopolıaǵa qarsy komplaens ázirleý arqyly 20 teńgeden 3 teńgege/dana deıin, orta eseppen 60 teńgeden  26 teńgege/dana deıin tómendedi" delingen agenttik habarlamasynda.