Prezıdent Qasym-Jomart Toqaev Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanulyn qabyldady, dep habarlady Aqorda saıty.

Bas múftı memleket basshysyna Qazaqstan musylmandary dinı basqarmasynyń pandemıa kezinde jasaǵan qaıyrymdylyq sharalary jaıynda málimet berdi.

"Naýryzbaı qajy Taǵanuly indet kezinde múftıat tarapynan aýrýhanalarǵa jasandy tynys alý, ottegi apparattary men medısınalyq qural-jabdyqtar, muqtaj jandarǵa dári-dármekter, meshitterdiń janyndaǵy tigin sehtarynda tigilgen betperdeler men qorǵanys kıimderiniń tegin taratylǵanyn atap ótti. Sonymen qatar "El úlesi – páterde" aksıasy aıasynda 314 baspana berilgenin aıtty. Budan bólek ımamdardyń bilimin kóterý, kadr daıarlaý máseleleri jaıynda baıandady.

Naýryzbaı qajy Taǵanuly Qasym-Jomart Toqaevqa múftıat aldaǵy ýaqytta "Ihsan" ilimin, Abaıdyń kemel adam konsepsıasyn keńinen dáriptep, nasıhattaý jumystarymen aınalysatynyn jetkizdi" delingen habarlamada.

Kezdesý barysynda Qazaqstan musylmandary dinı basqarmasynyń aldaǵy josparlary týraly da sóz boldy. Atap aıtqanda, Islam akademıasyn qurý, Islam jáne teologıa kitaphanasyn salý, elimizdegi meshitterdiń arhıtektýrasyn qazaqy salt-sanaǵa saı qalyptastyrý máseleleri aıtyldy.

Kezdesý sońynda prezıdent Qasym-Jomart Toqaev dinı basqarmanyń jumysyn joǵary baǵalap, aldaǵy bastamalaryna sáttilik tiledi.