Abaı atyndaǵy Qazaq memlekettik akademıalyq opera jáne balet teatrynda «qazaq válsiniń koroli» Shámshi Qaldaıaqovtyń 90 jyldyǵyna arnalǵan «Shámshi álemi» atty konsert ótti.

Konsert Abaı atyndaǵy memlekettik opera jáne balet teatrynyń sımfonıalyq orkestriniń súıemeldeýimen ótti. Dırıjer - kompozıtordyń uly Muhtar Qaldaıaqov boldy.

«Men óte baqyttymyn. Búgin men 15 jasar bala kezimdi esime túsirdim. Ákemniń 50 jasyna arnalǵan konsertti osy teatrdyń amfıteatrynda tamashalaǵanmyn. Mine, odan beri 40 jyl ótipti. Al osy óner ordasyna dırıjer bolyp kelgenime – 25 jyl. Búgin meniń balalarym sahnada óner kórsetti, óte qýanyshtymyn. Án keshine keler bolsam, biz baǵdarlama boıynsha Almaty qalasy ákiminiń estradalyq-sımfonıalyq orkestriniń jetekshisi, QR Eńbek sińirgen óner qaıratkeri Aleksandr Belákovpen jáne belgili kompozıtor Rınat Ǵaısınmen jumys istedik», - deıdi Muhtar Qaldaıaqov.

Kórermen 50-60 jyldardaǵy Almatynyń retro atmosferasyna kýá boldy. Abaı atyndaǵy memlekettik opera jáne balet teatrynyń úzdik solıseri kompozıtordyń jıyrmadan astam ánin oryndady. Atap aıtqanda «Ánim sen ediń», «Keshikpeı kelem dep en», «Aq bantık», «Qaıdasyń», «Baqyt qushaǵynda», «Meniń Qazaqstanym» jáne basqa ánder.

Abaı atyndaǵy memlekettik akademıalyq opera jáne balet teatrynyń solısi Gúlzat Daýrbaeva stýdenttik shaǵynda Shámshi Qaldaıaqov atyndaǵy án festıvaliniń laýreaty bolǵanyn aıtty.

«Búgin men Shámshi aǵanyń eki ánin oryndadym. Kompozıtor murasy árqaısymyzdyń júregimizde. Stýdent kezimde maǵan Shámshi aǵany kórý baqyty buıyrdy. Ol kisi maǵan batasyn bergen. Kompozıtordyń 90 jyldyǵyna arnalǵan konsertte halyqtyń júreginen máńgilik oryn alǵan ánder shyrqaldy. Onyń artynda talantty urpaq qalǵanyna qýanyshtymyn «, - deıdi ánshi.

Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/almatyda-shamshi-kaldayakovtyn-90-zhyldygyna-arnalgan-an-keshi-otti_a3707448