Búgin azamattyq belsendi, marqum Dýlat Aǵadildiń balasy Janbolat Aǵadildiń qaıtys bolǵany habarlandy. Resmı aqparatqa sáıkes, Dýlat Aǵadil 24 aqpanda júrek talmasynan kóz jumǵan. Ákesiniń qazasynan soń Janbolat pen baýyrlary Bekzat, Nurbolat Aǵadilderdiń qysym kórgeni týraly vıdeo áleýmettik jelide tarady. 

1977 jyly dúnıege kelgen Dýlat Shákiruly Aǵadil kóp balaly analarǵa arasha túsip, azamattyq quqyqtyń saqtalýyn talap etip kózge túsken belsendi edi. Azamattyq pozısıasyn ashyq bildirip, bılikke talap qoıǵany úshin birneshe ret ustalǵan. 2020 jyly 24 aqpanda shamamen saǵat 21:00-de polısıa qyzmetkerleri Dýlat Aǵadildi úıinen kúshtep tergeý ızolátoryna alyp ketken. Al kelesi kúni ishki ister mınıstrligi belsendiniń júrek talmasynan qaıtys bolǵanyn habarlady.

Dýlat Aǵadil qaıtys bolǵan soń, balalaryna birneshe ret qysym jasalǵany týraly áleýmettik jelide aqparat tarady.

Belsendiniń uly Janbolat Aǵadil óz oıyn, azamattyq pozısıasyn áleýmettik jelide erkin bildiretin. Otbasy músheleri jaıly aıtylǵan qaýesetterge de jelide jaýap bergen. Iýtýb jelisinde jarıalanǵan vıdeoda olardyń otbasysyna áldekimderdiń "Ábilázovten aqsha aldy" dep jala japqanyn aıtty. Vıdeo 2020 jyldyń 24 tamyzynda túsirilgen.

"24-i kúni meniń ákemdi alyp ketken. Maǵan qaıǵyly habarmen qaıtys bolǵanyn aıtty. "Ábilázovtan aqsha aldy" dep, ákemniń, sheshemniń atyn qorlap jatyr. Ábilázov túgili, eshkimnen aqsha alǵan joqpyz. Men de, sheshem de, ájem de, aǵa-inilerim de sóılespegen bolatyn. Bizdi aqsha aldy degeniniń bári ótirik. Eshqandaı aqsha bergen joq. Bizge kómektesip jatqan – qarapaıym qazaq eli. Myń alǵys aıtamyn" delingen kadrda Janbolat Aǵadil.

Maýsym aıynda áleýmettik jelilerde polısıa qyzmetkerleri belsendiniń uly Bekzat Aǵadildiń moınyn qylqyndyrǵan vıdeo tarady. Vıdeony D.Aǵadildiń týystary túsirgen. Polıseıler "belsendilerdi tasymaldap júr" degen syltaýmen marqumnyń ulyna kúsh kórsetken.

Osydan bes kún buryn 6 qarasha kúni "Aınur Qurmanov" Youtube arnasynda "Polısıa vnov arestovala syna Dýlata Agadıla - Nýrbolata" atty vıdeo jarıalandy. Vıdeoda azamattyq belsendi, marqum Dýlat Aǵadildiń uly Nurbolat Aǵadil ózin polıseıler Esil aýdandyq ishki ister bóliminde ustap otyrǵanyn aıtty.

"Men azamattyq belsendimin. Mine, meni Esil aýdandyq ishki ister bóliminde ustap otyr. Maǵan srochno advokat kerek. Telefonymdy julyp alyp jatyr. Qazir aıqaılap qaıtaryp aldym. Men eshqandaı zań buzǵan joqpyn. Sol sebepti eshqaıda kirmeımin. Qazir túngi saǵat 4:00. Bizdi 1,5 saǵattan keıin bosatýy kerek" degen Nurbolat Aǵadil kadrda.

* * *

Qamshy ujymy Janbolat Aǵadildiń otbasysyna qaıǵyra kóńil aıtady.