Birikken Ulttar Uıymy kúni qarsańynda ál-Farabı atyndaǵy QazUÝ ál-Farabıdiń 1150 jyldyǵyna, BUU-nyń 75 jyldyǵyna, BUU Órkenıetter alánsynyń 15 jyldyǵyna jáne BUU «Akademıalyq yqpal» baǵdarlamasynyń 10 jyldyǵyna arnalǵan ǵalamdyq konferensıa ótkizdi. Konferensıa Bas hatshy Antonıo Gýterrıshtiń BUU-nyń 75 jyldyǵyna oraı álemdik qoǵamdastyqqa arnaǵan beıneúndeýimen ashyldy.

BUU Bas hatshysy úndeýiniń negizgi leıtmotıvi – beıbit ómir úshin birigýge shaqyrý boldy. Jahandyq yntymaqtastyq pen áriptestik adamzat aldynda turǵan orasan zor qıyndyqtardy eńserýge jáne jarqyn bolashaq qurýǵa qolǵabys etedi. Osy negizgi tujyrym men «Beıbit ómirge arnalǵan sana» konferensıasynyń taqyryby uly oıshyl ál-Farabıdiń qaıyrymdy qoǵam qurý úshin adamdardy biriktirý ıdeıalarymen úndes.

Halyqaralyq onlaın-kezdesýde BUU Bas hatshysynyń orynbasary Fabrısıo Hohshıld-Drammond, BUU Órkenıetter Alánsynyń joǵary ókili Mıgel Anhel Morratınos, BUU «Akademıalyq yqpal» baǵdarlamasynyń jetekshisi Ramý Damodaran, QR Syrtqy ister vıse-mınıstri Erjan Ashyqbaev quttyqtaý sóz sóıledi. Ál-Farabıdiń shyǵarmashylyq murasyn álemdik azamattyq jáne turaqty damý jónindegi BUU baǵdarlamalarymen sınergıa turǵysynan qarastyrýǵa baǵyttalǵan joǵary deńgeıdegi is-shara BUU qurylymdary men baǵdarlamalarynyń basshylary, álemge tanymal ǵalymdar, belgili memlekettik jáne qoǵam qaıratkerleri, akademıalyq qoǵamdastyq pen BAQ ókilderiniń basyn qosty.

BUU Bas hatshysynyń orynbasary Fabrısıo Hohshıld-Drammond pen BUU «Akademıalyq yqpal» turaqty damý baǵdarlamasynyń jetekshisi Ramý Damodaran forým uıymdastyrýshylaryna alǵystaryn bildirip, qazaqstandyqtardy jáne álem qoǵamdastyǵyn órkenıettiń uly oıshyly ál-Farabıdiń 1150 jyldyǵymen quttyqtady. Sonymen qatar olar 2014 jyldan bastap tórtinshi ret qatarynan BUU-nyń «Akademıalyq yqpal» baǵdarlamasynyń Ǵalamdyq habyn basqaryp kele jatqan jáne osy baǵyttaǵy qazaqstandyq bastamalardy alǵa tartqan QazUÝ-dyń belsendi qyzmetin atap ótti.

«Bıyl Qazaqstan Prezıdenti Qasym-Jomart Toqaev BUU Bas assambleıasynda sóılegen sózinde jahandyq máselelerdi sheshýde kúsh-jiger biriktirýge arnalǵan birqatar mańyzdy jáne syndarly usynystar jasady. Máselen, bıologıalyq qaýipsizdik jónindegi halyqaralyq agenttik pen azyq-túlik qaýipsizdigi jónindegi halyqaralyq uıym qurý jónindegi usynys», – dedi Ramý Damodaran. Spıkerdiń pikirinshe, beıbit ómirge arnalǵan osy jáne basqa bastamalar álemdik qoǵamdastyqtyń asa úlken nazaryna laıyq.

Nú-Iorkten halyqaralyq onlaın-kezdesý qatysýshylaryn qarsy ala otyryp, BUU Órkenıetter alánsynyń Joǵary ókili Mıgel Anhel Morratınos mereıtoılyq konferensıada barshamen birge bolý ol úshin úlken mártebe ekenin basa aıtty. Ál-Farabı: «Tárbıesiz, adamgershilik qaǵıdatsyz bilim paıdanyń ornyna, zıan keltirýi múmkin» dep aıtyp ótken. Fılosoftyń bul dáıeksózi dúnıejúzindegi azamattyq bilim berýdiń ǵalamdyq baǵdarlamalaryna senim artýǵa bolatyn negiz. Ál-Farabı atyndaǵy QazUÝ ǵalamdyq azamattyqty qoldaı otyryp, uly gýmanıs murasyn qabyl aldy. BUU Órkenıetter alánsy ýnıversıtetpen seriktestigin jáne biz birlesip alǵa jyljytatyn ortaq qundylyqtardy maqtan tutady», – dedi Mıgel Anhel Morratınos.

Akademıalyq qoǵamdastyqtyń atynan negizgi spıker QazUÝ rektory, akademık Ǵalym Mutanov boldy, ol bilim men rýhanıat ıntegrasıasy negizinde jastardy álemdik azamattyq pen adamzattyń turaqty damýy rýhynda tárbıeleý mısıasy erekshe strategıalyq mádenı áleýeti bar ýnıversıtetterge júkteletinin atap ótti. BUU baǵdarlamasynyń Ǵalamdyq haby retinde QazUÝ jańa býyn ýnıversıtetin – «Ýnıversıtet 4.0» damytýdyń ózindik modelin ázirlep júzege asyrýda. Ol tek ózi úshin ǵana emes, búkil adamzattyń taǵdyry úshin jaýapty, joǵary rýhanı-adamgershilik qundylyqtarǵa ıe el jáne álem azamattaryn qalyptastyrýǵa baǵyttalǵan. Nú-Iorkte BUU-nyń shtab-páterinde usynylǵan bul modeldi halyqaralyq deńgeıde keńinen taratý usynyldy.

Konferensıada sonymen qatar Qazaqstan, Qyrǵyzstan, Tájikstan, Ózbekstan boıynsha IýNESKO-nyń Almatydaǵy klasterlik búrosynyń dırektory Krısta Pıkkat, BUU-nyń Jahandyq komýnıkasıalar departamentiniń Qazaqstandaǵy ókili Vlastımıl Samek, Túrkıadaǵy Órkenıetter Alánsynyń úılestirýshisi Bekır Karlyga, Kastılá-La-Mancha ýnıversıtetiniń (Ispanıa), Afınanyń Kapodıstrıa atyndaǵy ulttyq ýnıversıteti (Gresıa) jáne álemdegi basqa ýnıversıtetterdiń ókilderi sóz sóıledi.

Halyqaralyq kezdesýge qatysýshylar qaýipsizdikti, adamzattyń beıbit jáne turaqty damýyn qamtamasyz etý maqsatynda kúsh-jiger biriktirý qajettiligi týraly ortaq pikir bildirdi. Osy oraıda, uly fılosof ál-Farabıdiń gýmanısik murasy erekshe ózektilikke ıe ekendigin atady. Bul úderiste jastardyń jáne akademıalyq qoǵamdastyqtyń úlken rólin alǵa tarta otyryp, konferensıaǵa qatysýshylar QazUÝ rektorynyń BUU-nyń jahandyq azamattyq tujyrymdamasyna sáıkes «Ýnıversıtet 4.0» deńgeıine qol jetkizý úshin álem ýnıversıtetterin biriktirý josparyn birlesip qarastyrý týraly usynysyn qoldady.