Memleket basshysy «Konstıtýsıa: birlik, turaqtylyq, órkendeý» taqyrybyn arqaý etken halyqaralyq ǵylymı-tájirıbelik konferensıa barysynda ; «Qazaq handyǵynyń 550 jyldyǵyn toılaý arqyly qazaqtyń halyq, ult retinde aspannan salbyrap túspegenin búkil álemge pash etip otyrmyz»,-dep aıtyp ótti. Bul týraly «Qamshy» portaly Nur.kz-ke silteme jasaı otyryp habarlaıdy.
«Eń bastysy, óship bara jatqan qazaqtyń tilin, tarıhy men mádenıetin órkendetip, órisin keńeıttik. Mektepterdiń kópshiliginde, joǵary oqý oryndarynda sabaqtar qazaq tilinde ótetin boldy. Qazaq tilinde basylymdar, kitaptar shyǵaryp, jer sharyn túgel aralap, jınap, tarıhymyzdy ornyna keltirýge múmkinshilik aldyq. Óz tilimizdi, dinimizdi, dilimizdi órkendete otyryp, biz basqalardy kemitpedik, basqalardy tómendetpedik, qatar ustap, olardyń da quqyqtaryn syıladyq. Mine, bizdiń birligimiz, bizdiń tynyshtyǵymyzdyń arqaýy osy. Meniń bilýimshe, biz «Uly dala eli» dep sanalýymyz kerek. Keıbireýler «aspan asty elimiz» deıdi, keıbireýler «kúnshyǵys elimiz», deıdi. Biz uly dalanyń urpaǵymyz. Osy dalany bizdiń ata-babamyz saqtap, qan tógip, ter tógip ustap qalǵan. Qazaqstan men «Uly dala eli» ekeýi qatar júrse, durys bolady dep oılaımyn. Qazaq mádenıeti men tarıhy elimizdegi barsha ulystardyń rýhanı uıytqysyna aınaldy, atap ótkeli otyrǵan Qazaq handyǵynyń 550 jyldyǵy osynyń aıqyn kórinisi. Til, tarıh jáne mádenıettiń úndesýi -bizdiń myzǵymas rýhanı tirligimizdiń, el birliginiń negizi bolǵanyn bárimiz kórip otyrmyz. Ata-babalarymyzdyń uly tarıhy bar ekenin aldymen urpaǵymyzǵa, odan keıin búkil álemge pash etip otyrmyz»- dedi Elbasy óz sózinde.
Memleket basshysynyń Qazaq handyǵynyń 550 jyldyǵyna qatysty bul pikiri kóptegen sheneýnikterge oı salady degen úmittemiz. Esterińizde bolsa, «Qamshy» portalynda «Bira-aq adamy oılaný qabiletine ıe eldi bilesiz be?» dep atalatyn materıal jaryq kórgen bolatyn. Onda biz elbasy pikir bildirmegen qandaıda bir máselege basqalardyń da oı qosa qoıýy ekitalaı degendi meńzegen edik. Endigi kezekte atqa mingender qazaqtardy «Uly dala eliniń urpaqtary» dep aıtýdan taısalmaıtyn shyǵar degen úmittemiz.
Aınur Tóleý
