Atyraýda sportshy ólimine qatysty tergeý jumystary baıaý júrip jatyr. Bul týraly grepplıng kúresinen álem chempıony Esenbek Sıǵýatovtyń ákesi aıtty, dep habarlady astanatv.kz arnasy.

Oqıǵa osydan úsh aı buryn, 9 tamyzda 18 jastaǵy atyraýlyq sportshy Esenbek Sıǵýatov júreginen oq jaraqatyn alyp, oqıǵa ornynda jan tapsyrǵan. Marqumnyń ákesi Toqsanbaı Orazǵalıdyń aıtýynsha, tergeý jumystarynyń baıaý júrýi polıseılerdiń qylmysqa qatysynyń bolýymen túsindiriledi.

– Tergeý jumystary óte baıaý jáne durys, ornymen jasalyp jatqan joq. Sebebi qylmysty uıymdastyrǵan azamattar birinshi qamaýǵa alynýy kerek. Olar belgisiz sebeptermen áli kúnge deıin qamalmaı jatyr. Qylmysty uıymdastyrǵan qylmyskerler jazasyn tartyp, túrmede otyrýy kerek. Kúdiktiniń bireýi qarýdy jasyrǵan. Ekinshisi myltyqty atqan. Ekeýi de polısıa qyzmetkeri bolyp jumys  jasaǵan, – deıdi marqumnyń ákesi.

Polısıa departamentiniń málimetishe, qazirgi ýaqytta qylmystyq kodekstiń 99-baby (adam óltirý) boıynsha sotqa deıingi tergeý jumystary júrip jatyr. Tıisti sheshim is boıynsha saraptama qorytyndysy daıyn bolǵannan keıin qabyldanady.

Álem chempıonynyń ákesi naǵyz qylmyskerdi qamaýǵa alyp, jazalamaıynsha, ádildik izdeýdi toqtatpaıtynyn jetkizdi. Endi ol ishki ister mınıstrligine shaǵym jazbaq.