2021 jyldyń qańtarynan bastap Qazaqstandaǵy bilim berý uıymdarynyń barlyǵy "Sıfrlyq býhgalterıa men qarjy" júıesine kóshýdi bastaıdy. Bul týraly bilim jáne ǵylym mınıstri Asqat Aımaǵambetov paraqshasynda málimdedi.
Mınıstrdiń aıtýynsha, jańa júıeni engizýdegi maqsat – kópshilik úshin bilim salasyndaǵy qarjylandyrýdyń ashyqtyǵyn jáne tıimdiligin baqylaýdy qamtamasyz etý. Endi mekteptiń búdjetine, onyń árbir jumsaǵan teńgesine qatysty aqparatqa bilim jáne ǵylym mınıstrligi, basqa quzyrly memlekettik organdar, azamattyq qoǵam ókilderi qol jetkize alady.
Búginde bilim berý salasyn qarjylandyrý jyldan jylǵa artyp keledi. Sondyqtan Aımaǵambetov sol bólingen qarajatty tıimdi paıdalaný mańyzdyraq ekenin atap ótti.
– Kópshilik mektepterdi, balabaqshalar men kolejderdi bilim jáne ǵylym mınıstrligi respýblıkalyq búdjet esebinen qarjylandyrady dep esepteıdi. Odan bólek jalaqynyń ýaqytyly jáne durys eseptelýi, oqýlyqtardy satyp alý nemese bilim berý uıymdaryndaǵy jóndeý jumystaryn da mınıstrliktiń ózi tikeleı júrgizedi dep oılaıdy. Biraq is júzinde olaı emes. Zańǵa sáıkes bul jumys ákimdikterdiń quzyrynda.
Elimizde bilim berýdi basqarý organdarynyń sany 200-den asady, ıaǵnı, qarjylandyrý da sol qalalar, aýdandar men oblystardyń búdjetinen ótedi. Ákimshilendirý deńgeıi ártúrli ári kóp bolǵan soń olardy qadaǵalap otyrý óte qıyn.
Sondyqtan tipti oblystyq bilim basqarmalarynyń ózi kóp jaǵdaıda jalaqyny ýaqytyly tóleýge, oqýlyqtardy satyp alýǵa nemese mektep, kolejderdi jóndeý jumystaryna qatysty problemalardy buqaralyq aqparat quraldaryna shyqqanda nemese shaǵymdar kelip túskende bilip otyrady. Bul múldem durys emes, – dedi mınıstr.
Ata-analar men muǵalimderge olqylyqtardyń bolmaǵany mańyzdy. Sol úshin mınıstr qarjylandyrý júıesin sıfrlandyrý boıynsha bastamany qolǵa alǵanyn alǵa tartty. Atalǵan joba jalaqyny durys eseptemeý, qarjylyq buzýshylyqtar, josparlaý, qarjylandyrý kezindegi problemalardy sheshýge jáne bilim berý mekemeleriniń qarjylyq jaǵdaıyna jedel monıtorıń júrgizýge jaqsy múmkindik beredi.
– Býhgalterıamen qosa búdjetti josparlaý, memlekettik satyp alý, tarıfıkasıalaý, jumysqa alý prosesteri de avtomattandyrylady. Bul – bilim salasyna baǵyttalǵan qarjyny ashyq ári tıimdi paıdalanýdy qoǵam bolyp qadaǵalaýǵa baǵyttalǵan taǵy bir qadam, – dedi Asqat Aımaǵambetov.
Pikir qaldyrý