Eńbek jáne halyqty áleýmettik qorǵaý mınıstri Birjan Nurymbetov "Eńbek" baǵdarlamasy boıynsha áıelderge kredıt berý kólemi ulǵaıtylǵanyn aıtty. Bul týraly ol onlaın rejımde ótken aýyl áıelderiniń III forýmynda málimdedi.

– Aýyldyń órkendeýine áıelderdiń qosyp jatqan úlesi óte zor. Áıelderdiń bastamalaryna, aýyl áıelderine qoldaý kórsetý – mańyzy bar is. Búgin de bizdiń eńbek naryǵy jumyspen qamtýshy áıelderdiń joǵary deńgeıi men bilikti qyzmetkerlerdiń bolýymen sıpattalady. Resmı statısıkaǵa júginsek, bizdiń elimizde ekonomıkalyq belsendi halyqtyń sany 9 mln 200 myńǵa jetti. Onyń jartysy – 4,5 mıllıony áıelder. Olardyń 95 paıyzy jumyspen qamtylǵan. Onyń ishinde 1 mln 100 myńy aýylda eńbek etip jatqan áıelder, – dedi mınıstr.

Onyń aıtýynsha mınıstrlik óz tarapynan jumyspen qamtý, kásipkerlik bastamalardy qoldaý, zamanǵa saı daǵdylardy úıretý baǵytynda birqatar sharýa atqarylyp keledi.

– Elimizde iske asyrylyp jatqan "Eńbek" baǵdarlamasy halqymyzdy jumyspen qamtýǵa baǵyttalǵan. Bizdiń baǵdarlamada áıelderge erekshe basymdyq berilgen. Bıyl osy baǵdarlama boıynsha 246 myń áıel qatysty. Onyń ishinde aýylda turatyndary – 123 myń adam. Osy jyly biz óz tarapymyzdan baǵdarlamaǵa ózgeris engizip, áıelderge kredıt berý sharalary keńeıtildi. Bizde osy jyldan bastap kópbalaly analar, az qamtylǵan otbasylar kredıt alyp jatyr. Olar 22 mln teńgege deıin ala alady, – dep atap aıtty Nurymbetov.